Сүхбаатар дүүргийн нэгдүгээр хороо, Чингисийн өргөн чөлөөнд байрлах Монголын хүүхдийн ордны одоогийн гурван давхар барилгын хажууд зургаан давхар спорт цогцолбор барихаар болжээ. Уг төслийг хэрэгжүүлснээр хүүхэд, өсвөр үеийнхэнд зориулсан спортын сургалт, дасгалын орчин шинэ түвшинд хүрнэ гэж үзэж байна.
Монголын Хүүхдийн Ордны захирал Б.Цэнгэлмаагийн мэдээлснээр, 40,000 хүүхдийн багтаамжтай спортын ордонд самбо, таеквондо, теннис, усанд сэлэлт, үндэсний бөх, жүдо, сагсан бөмбөг, бадминтон, гар бөмбөг, шатар, уран гимнастик, байт харваа, хаданд авиралт, хөнгөн атлетик, Т-бall зэрэг нийт 16 төрлийн дугуйлан хичээллүүлэхээр төлөвлөсөн байна. Тооцооллоор жил бүр 7,200 гаруй хүүхэд эдгээр дугуйланд хамрагдах боломжтой аж.
Ийм төрлийн бүтээн байгуулалт хийх шаардлага үүссэн шалтгааныг “Хүүхдийн хөгжлийн орчин үеийн асуудлууд” олон улсын эрдэм шинжилгээний хурлын дүнтэй холбон тайлбарлажээ. Гурван жилд нэг удаа болдог уг хурлын үеэр Монгол Улсын хүүхдийн биеийн тамир, бие бялдрын хөгжил дэлхийн дунджаас доогуур гэсэн үзүүлэлт гарсан нь спорт цогцолбор байгуулах шийдвэр гаргахад нөлөөлсөн байна.
Зургаан давхар барилгын нийт төсөв ₮23.5 тэрбум байхаар тооцжээ. Тендерийг өнгөрсөн дөрөвдүгээр сард зарласан бөгөөд үнэлгээг энэ долоо хоногийн Баасан гарагт хийж, гэрээ байгуулахаар товлосон байна.
Тендер шалгаруулалтад зургаан компани оролцсон бөгөөд хамгийн бага үнийн санал нь ₮19 тэрбум, хамгийн өндөр нь ₮21 тэрбум байжээ. Ийнхүү санхүүжилтийн дүнгээс доогуур үнийн санал ирсэн ч төслийн сонгон шалгаруулалт үргэлжилж байгаа юм.
Үүнээс гадна 42 жил үйл ажиллагаа явуулж буй Хүүхдийн ордны барилгын дотор болон гадна засварт нэмэлт хөрөнгө шаардлагатай байгааг танилцуулсан байна. Урьдчилсан тооцоогоор энэ ажилд 2.4 тэрбум төгрөг хэрэгтэй гэж үзжээ.
- Байршил: Сүхбаатар дүүргийн нэгдүгээр хороо, Чингисийн өргөн чөлөө
- Барилга: зургаан давхар спорт цогцолбор
- Нийт төсөв: ₮23.5 тэрбум
- Спортын төрөл: 16
- Жилд хамрагдах хүүхэд: 7,200 гаруй
