Өнгөрсөн оны хоёрдугаар сарын 16-ны өдөр зуурдаар таалал төгссөн жүжигчин Ким Сэ Роны ар гэрийнхэн нөхөж баршгүй гарз хохирол амсаад зогсохгүй, сэтгэл зүйн гүн хямралд ороод байна. Түүний хамгийн сүүлд тоглосон “Before We Knew” уран сайхны киноны нээлтийн ёслолд ар гэрийнхэн нь оролцоогүй бөгөөд үүний шалтгаан нь гэр бүлийн нэг гишүүн нь амиа егүүтгэхийг завдсантай холбоотой байсныг эх сурвалжууд мэдээллээ.
Уг харамсалтай үйл явдал нь жүжигчин Ким Сү Хёнтой хийж буй хууль эрх зүйн маргаанаас үүдэлтэй ажээ. Талийгаачийн гэр бүлийн ойрын эх сурвалжийн өгүүлснээр, ар гэрийнхэн нь Ким Сү Хёныг бүх баримтыг үнэн зөвөөр хүлээн зөвшөөрч, талийгаачаас чин сэтгэлээсээ уучлалт хүсэхийг шаардаж байгаа юм. Тэдний зүгээс гаргаж буй гол гомдлуудыг тоймловол:
- Хуурамч нотлох баримт: Ким Сү Хён болон түүний хуулийн багийнхан худал мэдээлэл тарааж, гэр бүлийнхэнд нь сэтгэл зүйн тэвчихийн аргагүй өвдөлт учруулсан.
- Харилцааны хугацаа: Талийгаачийн талынхан тэднийг 2016 оноос буюу Ким Сэ Роныг 15 настай байхаас эхлэн таван жилийн турш харилцаатай байсан гэж үзэж байна.
- Гүтгэлэг доромжлол: Гэр бүлийн гишүүдийн эсрэг чиглэсэн цахим дайралт, доромжлол нь амиа егүүтгэх оролдлого хийхэд хүргэсэн тул үүнийг нэн даруй зогсоохыг шаарджээ.
Нөгөө талаас, жүжигчин Ким Сү Хёны агентлагаас гаргасан тайлбарт тэдний харилцааг 2019 оны зунаас 2020 оны намар хүртэл буюу Ким Сэ Роныг насанд хүрсний дараа үргэлжилсэн хэмээн мэдээлсэн байна. Агентлагийн зүгээс хохирол барагдуулах явцад авч хэрэгжүүлсэн арга хэмжээ нь гэр бүлийнхэнд нь улам бүр дарамт болж байгааг ар гэрийнхэн нь онцлов. Одоогоор талуудын дунд үүссэн энэхүү хууль зүйн маргаан болон ёс зүйн асуудал нь Өмнөд Солонгосын энтертайнмент салбарт томоохон шуугиан тарьж байна.
