2026 оны дөрөвдүгээр сарын 23-ны өдрийн байдлаар улсын хэмжээнд төллөвөл зохих 22.4 сая хээлтэгч малаас 11.2 сая эх мал төллөсөн байна. Ингэснээр нийт төллөлт 50.4 хувьтай үргэлжилж, 11.1 сая төл хүлээн авч бойжуулж байгаа талаар мэдээллээ.
Төлийн зүй бус хорогдол 127.2 мянган толгойд хүрсэн бол төл бойжилт 98.9 хувьтай байгаа аж. Энэ үзүүлэлт нь өмнөх оны мөн үеийн түвшинтэй ижил хадгалагдаж байгааг албаныхан онцолж байна.
Бүс нутгийн байдлаар авч үзвэл зүүн бүс мал төллөлтөөр хамгийн өндөр хувьтай байна. Тодруулбал, баруун бүсэд 50.4 хувь, зүүн бүсэд 53.7 хувь, төвийн бүсэд 48.1 хувь, хангайн бүсэд 50.2 хувьтай үргэлжилж байгаа юм.
Харин оны эхнээс хойш улсын хэмжээнд 212.1 мянган толгой мал зүй бусаар хорогдсон нь нийт мал сүргийн 0.3 хувийг эзэлж байна. Үүнээс тэмээ 182, адуу 17.7 мянга, үхэр 23.8 мянга, хонь 80.4 мянга, ямаа 89.8 мянган толгой байгаа нь хорогдлын бүтэц ямар байгааг харуулж байна.
Аймгуудаас Өвөрхангайд хамгийн өндөр хорогдол бүртгэгджээ. Тус аймагт 77.6 мянга, Булган аймагт 21.0 мянга, Дундговь аймагт 16.0 мянга, Сэлэнгэ аймагт 12.5 мянга, Увс аймагт 11.9 мянган толгой мал зүй бусаар хорогдоод байна.
- Улсын хэмжээнд мал төллөлт 50.4 хувьтай
- 11.2 сая эх мал төллөж, 11.1 сая төл бойжуулж байна
- Малын зүй бус хорогдол 212.1 мянган толгойд хүрчээ
