Apple компани 2025 оны сүүлчээр шинэ, хямд үнэтэй MacBook загвараа танилцуулах төлөвтэй байна. Энэхүү төхөөрөмж нь A18 Pro чиптэй байх бөгөөд Chromebook-ийн ангилалд өрсөлдөх анхны “бюджет” MacBook болох гэнэ гэж MacRumors мэдээлжээ.
Шинэ MacBook-ийн гол онцлогууд
Аналист Мин-Чи Куо-гийн мэдээлснээр, Apple 13 инчийн нимгэн, хөнгөн загвар гаргах бэлтгэлтэй байгаа бөгөөд энэхүү MacBook нь iPhone 16 Pro-д ашиглагдсан A18 Pro процессортой байна. Энэ бол Mac-д өмнө нь ашиглагдаагүй шийдэл боловч үнэ ба гүйцэтгэлийн тэнцвэрийг хангах зорилготой алхам гэж шинжээчид үзэж байна.
Гүйцэтгэлийн хувьд A18 Pro нь M4-өөс 40 хувь сул, гэхдээ M1 түвшинд дөхөх олон цөмийн хурдтай. Графикийн хувьд M1-ийг зарим үзүүлэлтээр гүйцдэг. Төхөөрөмж нь 8 ГБ RAM-тай байх бөгөөд Thunderbolt дэмжихгүй, зөвхөн USB-C холболттой. Өнгөний сонголт нь мөнгөлөг, цэнхэр, ягаан, шар байх аж.
Үнийн хүрээ ба гаргах хугацаа
Эх сурвалжуудын мэдээлснээр, үнэ 599–699 ам.доллар (ойролцоогоор 2–2.4 сая төгрөг) байх магадлалтай. Үйлдвэрлэл 2025 оны дөрөвдүгээр улиралд эхэлж, борлуулалт 2025 оны сүүл эсвэл 2026 оны эхээр эхэлнэ.
Хэрвээ энэ мэдээлэл батлагдвал, шинэ MacBook нь Apple-ийн хамгийн хямд үнэтэй зөөврийн компьютер болох юм.
