Table of Contents
Токиогийн Ханеда нисэх онгоцны буудлын ачаа тээшний хэсэгт хүн дүрст роботуудыг туршилтын журмаар ажиллуулж эхлэхээр боллоо. Японы үндэсний агаарын тээвэрлэгч “Japan Airlines” (JAL) компани ирэх сараас энэхүү туршилтыг албан ёсоор эхлүүлж, цаашид робот техникийг үйлчилгээний салбарт байнгын туслах болгохоор зорьж байна.
Ажилчдын ачааллыг технологиор хөнгөлөх нь
JAL компани энэхүү туршилтын төслөө 2028 оныг дуустал үргэлжлүүлэхээр төлөвлөжээ. Ингэснээр ачаа тээш хариуцсан ажилчдын биеийн хүчний ачааллыг бууруулаад зогсохгүй, тус улсад хурцаар тавигдаж буй ажиллах хүчний дутагдлыг технологийн шийдлээр нөхнө гэж тооцож байна. Сонирхуулахад, Ханеда нисэх онгоцны буудал нь жилд дунджаар 60 сая зорчигчид үйлчилдэг дэлхийн хамгийн ачаалалтай цэгүүдийн нэг юм.
Роботын хүч ба хүний хяналт
Тус агаарын тээврийн компани БНХАУ-ын Ханжоу хотод төвтэй “Unitree” компанийн хүн дүрст роботыг үйлчилгээндээ ашиглахаар танилцуулав. 130 см өндөртэй эдгээр машинууд нь биеийн хүч шаардсан хүнд ажлуудыг нугалах үүрэгтэй. Гэсэн хэдий ч аюулгүй байдлыг бүрэн хангах үүднээс хүмүүс хяналтын үүргийг гүйцэтгэсэн хэвээр байх болно гэдгийг JAL компанийн үйлчилгээ хариуцсан захирал Ёшитэрү Сүзүки онцолсон байна.
Японы хөдөлмөрийн зах зээл дэх томоохон сорилт
Япон улс аялал жуулчлалын сэргэлтээр энэ оны эхний хоёр сард гэхэд долоон сая гаруй гадаадын зочдыг хүлээн авчээ. Гэвч хүн амын хөгшрөлт болон төрөлтийн бууралт нь хөдөлмөрийн зах зээлд асар их хомстол үүсгээд байна. Шинжээчдийн судалгаагаар 2040 он гэхэд тус улсад 6.5 сая гадаад ажилчин нэмж шаардагдах төлөвтэй байгаа аж. Хэдийгээр нисэх онгоцны буудлуудын бүртгэл болон бусад үйлчилгээ автоматжсан ч ачаа тээвэр зэрэг “тайзны ард” хийгддэг ажлууд хүнээс ихээхэн хамааралтай хэвээр байгаа нь ийнхүү робот нэвтрүүлэх гол шалтгаан болжээ.
Одоо ашиглагдаж буй хүн дүрст роботууд нь нэг цэнэглэлтээр 2-3 цаг тасралтгүй ажиллах боломжтой. JAL компани цаашид туршилтын цар хүрээгээ тэлж, роботуудад агаарын хөлгийн салоныг цэвэрлэх зэрэг илүү нарийн, олон давтамжтай ажлуудыг хариуцуулахаар төлөвлөж байна.
