“Монгол Улсыг 2026–2030 онд хөгжүүлэх таван жилийн үндсэн чиглэл”-ийн төсөлд Батлан хамгаалах салбарын кибер аюулгүй байдлыг бэхжүүлэх бодлого тодорхой тусгагджээ. Үүнд “Зэвсэгт хүчний Кибер халдлага, зөрчилтэй тэмцэх төвийг чадавхжуулах” ажлыг хэрэгжүүлэхээр төлөвлөсөн байна.
Энэхүү төсөл хэрэгжсэнээр Монгол Улс кибер орон зай дахь урьдчилан сэргийлэх, илрүүлэх, хариу арга хэмжээ авах үйл ажиллагаагаа илүү шуурхай болгох боломжтой болно. Энэ нь батлан хамгаалах салбарын мэдээллийн аюулгүй байдлын үндсэн тулгуур болж, улсын хэмжээнд кибер халдлагаас хамгаалах системийг шат дараатай сайжруулах зорилготой.
Мэргэжилтэн бэлтгэх шинэ тогтолцоо
Төслийн хүрээнд дараах чиглэлээр мэргэжлийн хүний нөөц бүрдүүлэх ажлыг эхлүүлэхээр тусгажээ:
- Кибер аюулгүй байдлын чиглэлээр цэргийн инженер, техникч, шинжээч бэлтгэх
- Олон улсын түвшний давтан сургалт, туршлага солилцох хөтөлбөр хэрэгжүүлэх
- Гадаад орнуудтай стратегийн түншлэл хөгжүүлж, мэдээллийн аюулгүй байдлын хамтын ажиллагааг өргөжүүлэх
Ингэснээр Монгол Улсад кибер орон зайд ажиллах мэргэшсэн мэргэжилтэн, инженерийн сан бүрдэж, технологийн шинэчлэлд тулгуурласан батлан хамгаалах бүтэц бий болох нөхцөл бүрдэх юм.
Үндэсний аюулгүй байдлын дархлаа бэхжинэ
Шинэ технологид суурилсан анги, нэгж байгуулж, кибер орчны аюулд шуурхай хариу өгөх систем бий болгох нь энэ төслийн гол зорилго. Энэ нь зөвхөн Батлан хамгаалах яамны хүрээнд төдийгүй, улсын мэдээллийн дархлааг хамгаалах үндэсний хэмжээний алхам гэж мэргэжилтнүүд үнэлж байна.
Төслийг хэрэгжүүлснээр Монгол Улс кибер халдлагын эрсдэлийг бууруулж, дотоод, гадаад аюулгүй байдлын бодлогыг илүү уялдаатай хэрэгжүүлэх боломжтой болох юм.
