Томуу, томуу төст өвчний дэгдэлтийн үеийн хариу арга хэмжээ, зохицуулалтыг хэлэлцдэг Тохиолдлын удирдлагын тогтолцооны баг хуралдаж, нөхцөл байдлын талаарх тандалтын мэдээлэл, орчны зохицуулалтын багуудын ажил, мөн “томуугийн үзлэг, оношилгооны хэсэг” байгуулах санал зэрэг гол асуудлуудыг хэлэлцжээ. Хурлын үеэр эмнэлзүйн ачаалал, насны бүлгийн өвчлөл, өвчлөлийн оргил үеийн 10 жилийн судалгааг нэгтгэн дүгнэсэн байна.
Сүүлийн 10 жилийн тандалтын дүнгээр томуугийн вирусийн идэвхжил ихэвчлэн жилийн 51–52 дахь долоо хоногт оргилдоо хүрдэг нь тогтоогдсон. 2025 оны 47 дахь долоо хоногийн мэдээллээр өмнөх долоо хоногтой харьцуулахад 0–4 насны хүүхдийн өвчлөл 0.5–1.5 хувиар бага болсон бол 5–14 насны хүүхдүүдийн дунд 2.3–2.4 хувиар өссөн, мөн 65 болон түүнээс дээш насныхны дунд 0.1 хувиар нэмэгдсэн үзүүлэлт гарчээ. Эдгээр тоон мэдээлэл нь томуугийн тархалт ойрын өдрүүдэд үргэлжлэн нэмэгдэх хандлагатай байгааг харуулж байгаа тул, сургуулийн дунд ангийн сурагчдын хичээлийг шууд танхимаар эхлүүлэх нь эрсдэлтэй гэж баг үзсэн байна.
Үүнтэй уялдуулан Боловсролын сайдын 11 дүгээр сарын 27-нд гаргасан тушаалд өөрчлөлт оруулахгүй, өмнөх цахим сургалтын горимыг хэвээр үргэлжлүүлэх нь зүйтэй гэж дүгнэжээ. Тушаалын дагуу Нийслэлийн Баянзүрх, Баянгол, Налайх, Сүхбаатар, Сонгинохайрхан, Хан-Уул, Чингэлтэй дүүрэгт байрлах өмчийн бүх хэлбэрийн ерөнхий боловсролын сургуулиудын бага, дунд ангийн хичээл тодорхой хугацаанд цахим болон танхимын хослолоор явагдах нь хэвээр байна.
Товчоор:
- 1–5 дугаар анги:
- 2025 оны 12 дугаар сарын 8–12-нд хичээлээ танхимаар үргэлжлүүлнэ.
- 6–9 дүгээр анги:
- 2025 оны 12 дугаар сарын 8–12-ны хооронд хичээлээ цахимаар үзнэ.
Бага, дунд ангийн сурагчид цахимаар хичээллэх долоо хоног дууссаны дараа буюу тусгай горим хугацаандаа өндөрлөсний дараагаас “2025–2026 оны хичээлийн жилийн бүтэц”-д заасны дагуу бүх сургалт хуваарьт ёсоор танхимын хэлбэрт шилжин хэвийн үргэлжлэхээр төлөвлөжээ.
