Засгийн газрын өнөөдрийн хуралдаанаар Мансууруулах эм, сэтгэц нөлөөт бодисын эргэлтэд хяналт тавих тухай хуулийн шинэчилсэн найруулгын төслийг хэлэлцэн дэмжиж, Улсын Их Хуралд өргөн мэдүүлэхээр шийдвэрлэлээ. Энэхүү төслийг баталснаар хар тамхи болон сэтгэцэд нөлөөт бодисын хэрэглээ, эргэлтэд тавих хяналтыг илүү нарийвчлан зохицуулах зорилготой байна.
Засгийн газрын зүгээс мансууруулах бодистой холбоотой асуудал нь үндэсний аюулгүй байдлын хэмжээнд хүрсэн гэж дүгнэжээ. Тухайлбал, 2002 онд ийм төрлийн гэмт хэрэг цөөн бүртгэгддэг байсан бол 2025 оны байдлаар гэмт хэрэг 307, зөрчил 394 бүртгэгдсэн нь өмнөх оны мөн үетэй харьцуулахад эрчимтэй өссөн үзүүлэлт болсон байна.
Хуулийн шинэчилсэн найруулгад дараах гол зохицуулалтуудыг тусгажээ. Үүнд:
- Мансууруулах эм, сэтгэц нөлөөт бодисын үндэсний жагсаалтыг бий болгох
- Шинээр гарч буй эм, бодисыг шуурхай бүртгэх тогтолцоог нэвтрүүлэх
- Донтох эмгэгтэй хүмүүсийг эмчлэх, сэтгэц болон бие махбодын нөхөн сэргээх ажиллагааг тодорхой болгох
Мөн хар тамхи үйлдвэрлэх, тээвэрлэх, бусдад хэрэглүүлэх зэрэг ноцтой гэмт үйлдэлд ногдуулах хариуцлагыг нэмэгдүүлэх, түүнчлэн ийм төрлийн гэмт хэрэг үйлддэг бүлэглэлүүдэд хүлээлгэх хуулийн хариуцлагыг чангатгах зорилгоор Эрүүгийн хуульд өөрчлөлт оруулах санал боловсруулжээ. Энэхүү саналыг Засгийн газар дэмжсэн талаар Хууль зүй, дотоод хэргийн дэд сайд Д.Мөнх-Эрдэнэ мэдээлсэн байна.
