Table of Contents
Өнөөдрийн УИХ-ын чуулганаар нийт 17 асуудал хэлэлцэхээр төлөвлөсний нэг нь “Шинэ тойрог зам” төслийн санхүүжилтийн хүрээнд гаргах Засгийн газрын өрийн баталгааны асуудал байлаа. Энэ хүрээнд Нийслэлийн хөрөнгө оруулалтын газрын зүгээс 2025 онд авах 260 сая ам.долларын зээлийн 85 хувьд төрөөс баталгаа гаргуулах хүсэлтийг Сангийн яаманд уламжилжээ.
Шийдэх асуудлууд ба гишүүдийн байр суурь
УИХ-ын гишүүн П.Сайнзориг “Авто машины тоо сүүлийн 10 жилд 80%-иар өссөн. Харин замын дундаж хурд 7-10 км/цаг байгаа нь иргэдийн бухимдлыг нэмэгдүүлж байна. Түгжрэлээс болж алдагдаж буй боломжийн өртгийг тооцсон судалгаа бий юу? Энэ зам түгжрэлийг хэрхэн бууруулах вэ?” хэмээн тодруулсан юм.
Хотын даргын тайлбар
Хотын захирагч Х.Нямбаатар хэлэхдээ:
- Нэгдүгээр тойрог зам 24.7 км урттай. Үүнээс:
- 9 км нь гүүрэн байгууламж,
- 2 км нь туннель,
- 14.8 км нь авто зам байна.
- Өдөрт 580,000 орчим автомашин хотын хөдөлгөөнд оролцдог бол эдгээрийн 30% буюу 180,000 орчим тээврийн хэрэгсэл уг замаар зорчино гэж тооцжээ.
- Туулын хурдны зам руу нэвтрэхэд нэг өдрийн ₮5000 төлбөртэй бөгөөд хэдэн ч удаа орж гарч болно. Ийнхүү 10 жилийн дотор замын зардлыг нөхнө гэж үзсэн байна.
- Улаанбаатарын сарын дундаж цалин 2.2 сая төгрөг. Нэг цагийн цалин 13,000₮. Түгжрэлийн улмаас хүн жилд нэг сар орчим хугацааг алдаж, өндөр өртөг гарч байна гэж тооцжээ.
- Аюултай ачааг хотын төвөөр нэвтрүүлэхийг хориглож, Туулын болон тойрог замаар тээвэрлэх зохицуулалт хийхээр болсон байна.
Эдийн засгийн эрсдэл ба үнэлгээ
Сангийн яам төслийн эрсдэлийн үнэлгээг хийж, УИХ-д өргөн барьсан тогтоолын төсөлд дараах дүгнэлтийг гаргав:
- Өрийн удирдлагын тухай хуульд заасан шалгууруудыг хангаж байгаа ч,
- Төсвийн эх үүсвэр батлагдаагүй,
- Орлогын тооцоолол хэт өөдрөг байж болзошгүй тул эрсдэлийг дундаж гэж үнэлжээ.
