Европын хэд хэдэн оронд бараг 30 жилийн дараа тохиож буй ховор одон орны үзэгдэл болж, нарны бүтэн болон хэсэгчилсэн хиртэлтийг олон сая хүн ажиглалаа. Их Британид байсан ажиглагчид нарны хэсэгчилсэн хиртэлтийг харсан бөгөөд үзэгдлийн оргил үе Британийн зуны цагаар 19:00 цагийн орчимд тохиожээ.
Тухайн үед ихэнх газарт сар нарны 90 гаруй хувийг халхалсан байна. Харин Гренланд, Исланд болон Испанийн зарим хэсэгт нар бүрэн хиртэж, өдөр мэт гэрэлтэй байсан тэнгэр богино хугацаанд харанхуйлсан аж.
Испанийн эрх баригчид нар хиртэлтийг хамгийн тод харах боломжтой хөдөө орон нутгийн бүсүүдэд тусгай ажиглалтын цэг байгуулсан байна. Мөн олон тооны цагдаагийн алба хаагчийг дайчилж, олон нийтийн хөдөлгөөн, аюулгүй байдлыг зохицуулжээ.
Мадридын хойд хэсэгт орших Буйтраго-де-Лосоя сууринд хүмүүс тэнгэр аажмаар харанхуйлах мөчийг алга ташин угтсан байна. Оройн 20:30 цагийн орчимд сар нарыг бүрэн халхлах үед нарны ирмэгээр гэрэл цацрах Бэйлийн сувд хэмээх тод цэгүүд тэнгэрийн хаяанд үзэгдсэн ч энэ үзэгдэл ердөө нэг минут орчим үргэлжилжээ.
Нар хиртэлтийн онцлох мэдээлэл:
- Их Британид нарны хэсэгчилсэн хиртэлт ажиглагдсан;
- Гренланд, Исланд болон Испанийн зарим хэсэгт бүтэн хиртэлт тохиосон;
- Испанийн хойд хэсэг болон Балеарын арлуудад 6 хүртэлх сая жуулчин ирнэ гэж тооцоолсон;
- Иберийн хойгт хамгийн сүүлд 1912 онд нарны бүтэн хиртэлт ажиглагджээ.
Испанийн дараа Исландын ихэнх нутгаар нар хиртэлт ажиглагдсан боловч үүл ихтэй байсан тул үзэгдэх байдал зарим газарт тааруу байв. Гэсэн ч тус улсын баруун захын хэсэгт үүл түр сарниж, нутгийн иргэд болон жуулчид тэнгэрийн ховор үзэгдлийг харах боломжтой болжээ.
Исланд болон Испанийн хойд хэсэгт 27 жилийн дараа Баруун Европт анх удаа тохиосон нарны бүтэн хиртэлтийг үзэхээр сая сая хүн цугласан байна. Испанийн эрх баригчид нар хиртэлт харагдах бүсүүд, ялангуяа хөдөө орон нутагт жуулчдын урсгал эрс нэмэгдэнэ гэж тооцоолжээ.
Иберийн хойгт дараагийн нарны бүтэн хиртэлт 2027 оны наймдугаар сарын 2-нд тохионо. Харин 2028 оны нэгдүгээр сард цагираг хэлбэрийн нар хиртэлт болох бөгөөд эдгээрийг хамтад нь “Иберийн хойгийн хиртэлтийн гурвал” хэмээн нэрлэж байна.
