АНУ-ын Ерөнхийлөгч Доналд Трамп Ираны засаг захиргаанд хандан хатуу сануулга өгч, хэрэв цөмийн хөтөлбөрийн асуудлаар шинэ тохиролцоонд хүрэхгүй бол дараагийн цэргийн цохилт өмнөхөөсөө хамаагүй хүчтэй байх болно гэж мэдэгдлээ. Тэрбээр өмнө нь Ирантай байгуулсан цөмийн гэрээнээс АНУ-ыг гаргаж байсан төдийгүй өнгөрсөн оны зургаадугаар сард тус улсын цөмийн байгууламжуудад агаарын цохилт өгөх шийдвэр гаргаж байсан түүхтэй.
Бүс нутаг дахь хурцадмал байдал дахин оргилдоо хүрч байгааг дараах үйл явдлууд баталж байна. АНУ-ын Тэнгисийн цэргийн хүчин Ойрх Дорнодод томоохон хэмжээний төвлөрөл үүсгэж эхэлсэн бөгөөд байлдааны онгоц тээвэрлэгч “USS Abraham Lincoln” хөлөг Ираны эрэгт цохилт өгөхүйц зайд ойртон иржээ. Иранд Исламын дэглэмийг эсэргүүцсэн иргэдийн жагсаал намжаад буй энэ үед Вашингтон ийнхүү цэргийн давуу байдлаа үзүүлж эхэлсэн нь Тегеранд үзүүлэх шахалтыг нэмэгдүүлж байна.
Харин Ираны тал АНУ-ын энэхүү үйлдлийг эрс эсэргүүцэж, хариу цохилт өгөхөд бэлэн байгаагаа мэдэгдэв. Ираны Дээд удирдагчийн зөвлөх Али Шамхани хэлэхдээ, хэрэв АНУ цэргийн арга хэмжээ авбал Иран улс Израил болон АНУ-ын холбоотнуудыг бай болгоно гэдгийг хатуу санууллаа. Гадаад хэргийн сайд Аббас Аракчи ч мөн адил тус улсын зэвсэгт хүчин “бууны гох дээр хуруугаа тавьсан” бэлэн байдалд байгааг онцлон, аливаа түрэмгийллийг хариугүй орхихгүй гэдгээ мэдэгдсэн байна.
Олон улсын ажиглагчид энэхүү дипломат болон цэргийн сөргөлдөөн нь бүс нутгийн тогтвортой байдалд аюул учруулж, томоохон хэмжээний зэвсэгт мөргөлдөөнд хүргэж болзошгүйг Reuters агентлаг онцолж байна. Одоогоор хоёр тал хэлэлцээрийн ширээний ард суух бус, харин бие биедээ цэргийн хүчээр сүрдүүлэг үзүүлэх замыг сонгоод байгаа нь нөхцөл байдлыг улам тодорхойгүй болгож байна.
