Их Британийн Хэмпшир гүнлэгийн 65 настай оршин суугч Иэн Пейтон 1295.8 кг жинтэй аварга хулуу ургуулжээ. Энэ амжилтыг Беркшир гүнлэгт болсон тэмцээний үеэр албан ёсоор баталгаажуулж, Гиннесийн амжилтын номд бүртгэсэн байна.
Багира хэмээн нэрлэсэн уг хулуу өмнөх 1278.8 кг-ын дэлхийн дээд амжилтыг эвджээ. Тэрхүү амжилтыг Пейтон 2025 онд ихэр ах Стюарттайгаа хамт тогтоож байсан юм.
Харин энэ удаа Стюарт дэлхийг тойрон аялах болсон тул Пейтон дээд амжилтын төлөө ганцаараа ажиллажээ. Түүний хэлснээр, хоёр сарын турш өдөр бүр ургамлаа арчлахад 5-6 цаг зарцуулсан байна.
Хулууг өдөрт ойролцоогоор 490 литр усаар усалж, нэмэлт үндэс гаргуулахын тулд ишийг нь зориуд шороогоор дарж байжээ. Ийм арчилгааны ачаар хулуу бүх чиглэлдээ өдөрт ойролцоогоор 40 см-ээр томорч байсан байна.
“Хулууг өргөгчөөр өргөх үед хэт хүнд байгааг анхааруулсан бүх гэрэл хяналтын самбар дээр зул сарын гацуур шиг зэрэг ассан” гэж Пейтон ярьжээ.
Тэрээр мөн ийм өндөр амжилтад ганцаараа хүрч чаддагаа харуулсандаа баяртай байгаагаа хэлсэн байна. Албан ёсны жинлэлт дууссаны дараа аварга хулууг фермийн амьтдын тэжээл болгон ашиглахаар төлөвлөжээ.
