Цаг уурын өөрчлөлтийн улмаас Европын далайн эргүүдэд “португал хөлөг онгоц” гэгддэг, медузтай төстэй хортой далайн амьтан болох физали (Physalia) ихээр үзэгдэх боллоо. Энэ талаар “Financial Times” сонин мэдээлжээ.
Испани, Францын эргийг угаадаг Бискайн булангийн дагуух нутгуудад тропикийн усанд ихэвчлэн тааралддаг уг хортой амьтнаас сэрэмжлэхийг жуулчид болон нутгийн иргэдэд анхааруулж байна. Атлантын далайн сав газарт тэд харагдах болсон нь удаан үргэлжилсэн агаарын халалт болон усны температур нэмэгдсэнтэй холбоотой юм.
Цаг уурын өөрчлөлтийн “World Weather Attribution” судалгааны төслийн эрдэмтдийн тэмдэглэснээр, дэлхийн дулааралгүйгээр Европын усны температур ийм өндөр хэмд хүрэх нь “бараг боломжгүй” байжээ. Тэдний мэдээлснээр цаг уурын өөрчлөлтийн улмаас Газар дундын тэнгисийн дулаан ойролцоогоор 2 градусаар, Бискайн булан 1.4 градусаар, харин Ирландын тэнгис болон Ла-Маншийн хоолой 1.3 градусаар нэмэгдсэн байна.
Хойд Каролинагийн Их Сургуулийн далайн экологч Жон Бруно тус хэвлэлд мэдээлэхдээ, хэт халалтын улмаас загас, шувуу, далайн сүүн тэжээлтнүүдийн тоо толгой цөөрч байгаа бол медуз болон физали зэрэг амьтад температурын өсөлтөд илүү тэсвэртэйг онцолжээ. Тэд усны температур нэмэгдэхэд үүсдэг хүчилтөрөгч болон шим тэжээлийн дутагдлыг илүү сайн даван туулдаг байна. Түүнчлэн махчин далайн амьтдыг ихээр агнаж байгаа нь тэдний тоо толгой өсөхөд эерэгээр нөлөөлжээ.
Судлаачдын тэмдэглэснээр, физалитай хүрэлцэх нь ихэвчлэн амь насанд аюулгүй ч хохирогчдын ойролцоогоор 10 хувь нь эмнэлэгт хэвтэх шаардлагатай болдог. 2026 оны зун Францад “португал хөлөг онгоц”-нд түлэгдсэн мянга гаруй тохиолдол бүртгэгдээд байна.
Медузтай төстэй харагддаг физали нь “португал дайнч хөлөг онгоц” нэрээрээ өргөн алдаршсан. Тэдний колони нь далайн урсгал болон салхины тусламжтайгаар шилжин нүүдэллэдэг. Физалийг хэдэн метр урттай бараан хөх өнгийн тэмтрүүлүүдээр нь хялбархан таних боломжтой. Мэргэжилтнүүд хуурай газарт гарсан байсан ч эдгээр далайн амьтдад хүрч болохгүй, учир нь эрүүл мэнд болон амь насанд аюултай хүчтэй түлэгдэлт үүсгэх эрсдэлтэйг сануулж байна.
