Монгол Улсын Ерөнхийлөгчийн ивээл дор зохион байгуулагдаж буй Олимпын таеквондогийн Ази тивийн аварга шалгаруулах тэмцээн сонирхолтой тулаануудаар үргэлжилж байна. Олимп болон паралимпын наадмын чансааны чухал оноо олгодог тус өндөр зэрэглэлийн тэмцээнд дэлхийн 43 орны 1,300 гаруй шилдэг тамирчид хуран цуглаж, хурд хүчээ сорин өрсөлдөж байгаа юм.
Тус тэмцээний пара таеквондогийн эрэгтэйчүүдийн -63 кг-ын жинд эх орноо төлөөлөн оролцож буй дэлхийн аварга, паралимпын мөнгөн медальт Г.Болор-Эрдэнэ гайхалтай тоглолтуудыг үзүүлсээр хагас шигшээд шалгарлаа. Тэрбээр ийнхүү шилдэг дөрвөн тулаанчийн нэгээр үлдсэнээр тивийн аваргын медалийн болзлоо албан ёсоор хангаад байна.
Манай тамирчны хагас шигшээ хүртэлх тулаануудын үр дүн болон тэмцээний үндсэн төрлүүдийг багцалж харуулбал:
- Эхний тойрог: Малайзын тулаанч Мухамед Амирулыг илүүрхэн хожиж, шигшээ наймд үлдсэн.
- Шигшээ наймын тулаан: Ираны шилдэг тулаанч Амирхоссейн Ализадетай учраа таарч, эхний үед 13:9, шийдвэрлэх хоёрдугаар үед 11:10-аар тус тус ялалт байгуулав.
- Тэмцээний ангилал: Энэ удаагийн Азийн аварга нь Пүмсэгийн 9, тулааны 27 болон пара таеквондо гэсэн үндсэн төрлүүдээр явагдаж байна.
Ираны тамирчинтай хийсэн хоёрдугаар үеийн тулаан туйлын тэнцүүхэн, ширүүн өрнөсөн ч манай аварга төгсгөлийг нягт хийснээр ялалтыг өөрийн талд эргүүлж чадсан юм. Одоо тэрбээр тивийн аваргын алтан медалийн төлөөх хариуцлагатай тулаануудаа үргэлжлүүлэн хийхээр бэлтгэж байна.
