Монгол Улсад олон улсын COP17 бага хурал зохион байгуулагдаж байгаатай холбогдуулан 2026-2027 оны хичээлийн жилийн эхний хоёр долоо хоногийн хичээлийг цахимаар явуулах Боловсролын сайдын тушаал гарлаа. Уг шийдвэрийн дагуу улсын хэмжээнд сургалтын үйл ажиллагаа явуулж буй 68 их, дээд сургууль болон коллежийн танхимын хичээл есдүгээр сарын 16-ны өдөр албан ёсоор эхлэхээр болж байна.
Сургалтын төлбөр ба Боловсролын зээлийн сангийн зохицуулалт
Шинэ хичээлийн жилд их, дээд сургуулиудын сургалтын төлбөр дунджаар 5.9 сая төгрөг байгаа бөгөөд суралцагчдад Боловсролын зээлийн сангаас (БЗС) олгодог зээл, тэтгэлэг болон буцалтгүй тусламжийн хөтөлбөрүүд үргэлжлэн олгогдоно. Түүнчлэн өнгөрсөн хавар зээлийн сангаас санхүүжилт нь шилжиж ороогүй байсан оюутнуудад хичээл сонголтоо саадгүй хийх боломжийг олгох чиглэлийг БЗС-аас сургуулиудад өгчээ.
