2026 оны наймдугаар сарын 31-нээс есдүгээр сарын 10-ныг хүртэлх 10 хоногийн цаг агаарын урьдчилсан төлөвөөр сарын эхний өдрүүдэд ихэнх нутгаар тогтуун, өдөртөө дулаан байна. Харин есдүгээр сарын 3-наас нутгийн баруун хагаст, цаашдаа ихэнх нутгаар сэрүүсэж, уулархаг нутгаар хур тунадас орох төлөвтэй байна.
Хур тунадасны хувьд наймдугаар сарын 31, есдүгээр сарын 1-нд Алтай, Хангай, Хөвсгөлийн уулархаг нутгаар бороо орно. Есдүгээр сарын 2-нд баруун аймгуудын нутгийн өмнөд хэсэг, төвийн аймгуудын нутгийн баруун хэсгээр хур тунадастай байх бол 3, 4-нд баруун болон төвийн аймгуудын зарим газраар бороо, уулархаг нутгаар хур тунадас орох төлөвтэй байна.
Есдүгээр сарын 5, 6-нд төв, говь, зүүн аймгуудын нутгийн зарим газраар бороо орно. Мөн 7-нд Алтайн уулархаг нутгаар, 8-нд нутгийн зарим газраар хур тунадас орж болзошгүй байна.
Ирэх өдрүүдийн цаг агаарын гол анхааруулга:
- наймдугаар сарын 31-нээс есдүгээр сарын 2 хүртэл ихэнх нутгаар өдөртөө дулаан байна;
- есдүгээр сарын 3-наас баруун хагаст, цаашдаа ихэнх нутгаар сэрүүснэ;
- 3, 4-нд говь, тал, хээрийн нутгаар салхи ширүүснэ;
- 5-нд нутгийн өмнөд хэсгээр салхи секундэд 15-17 метр хүрнэ;
- уулархаг нутгаар шөнөдөө 4 хэмийн хүйтнээс 1 хэм дулаан болж сэрүүсэх төлөвтэй.
Салхины хувьд есдүгээр сарын 1-нд Алтайн салбар уулсаар, 2-нд Алтайн салбар уулс болон Арц Богдын өвөр хоолойгоор ширүүснэ. Харин 3, 4-нд говь, тал, хээрийн нутгаар, 5-нд нутгийн өмнөд хэсгээр секундэд 15-17 метр хүрэх тул малчид, тариаланчид, тээвэрчид анхаарах шаардлагатай байна.
Агаарын температур наймдугаар сарын 31-нээс есдүгээр сарын 2 хүртэл ихэнх нутгаар дулаан байна. Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир, Тэрэлж голын хөндийгөөр шөнөдөө 3-8 хэм, өдөртөө 19-24 хэм дулаан байх бол Их нууруудын хотгор болон говийн бүс нутгийн баруун хэсгээр өдөртөө 31-36 хэм хүрнэ.
Есдүгээр сарын 3-наас сэрүүсэж, уулархаг нутгаар шөнөдөө 4 хэмийн хүйтнээс 1 хэм дулаан, өдөртөө 11-16 хэм байна. Их нууруудын хотгор болон говийн бүс нутгийн өмнөд хэсгээр өдөртөө 24-29 хэм, говийн бүс нутгийн хойд хэсгээр 21-26 хэм, бусад нутгаар 15-20 хэм дулаан байх төлөвтэй байна.
Улаанбаатар хот орчимд есдүгээр сарын 4-нд бага зэргийн бороо, 6-нд бороо орно. Салхи есдүгээр сарын 2-нд баруун өмнөөс хойш эргэж, 3-нд баруун өмнөөс секундэд 7-12 метр хүрч ширүүсэх бол бусад хугацаанд секундэд 5-10 метр байна.
Нийслэлд наймдугаар сарын 31-нээс есдүгээр сарын 3 хүртэл шөнөдөө 9-14 хэм, өдөртөө 25-30 хэм дулаан байна. Харин есдүгээр сарын 4-нөөс сэрүүсэж, шөнөдөө 4-9 хэм, өдөртөө 15-20 хэм дулаан болох төлөвтэй байна.
