АНУ-ын “Интер Майами” клубын довтлогч Лионель Месси гэр бүлийн хамтаар Аргентины Росарио хотын ойролцоох Эль-Прадо оршуулгын газарт аав Хорхе Мессигээ эцсийн замд нь үдлээ. EFE агентлагийн мэдээлснээр, оршуулгын ажиллагаа аюулгүй байдлын өндөржүүлсэн бэлэн байдалд, зөвхөн гэр бүл, ойр дотны хүмүүсийн хүрээнд өрнөсөн байна.
Л.Месси эхнэр Антонела Рокуцо болон хүүхдүүдийнхээ хамт урьд орой нь Росариод хүрэлцэн ирж, ээж Селиа Куччиттини, ах Родриго, Матиас болон дүү Мария Соль нартайгаа нэгджээ. Нисэх онгоцны буудал болон оршуулгын газрын ойролцоо цугласан олон зуун хөлбөмбөгийн хорхойтнууд Месси болон түүний гэр бүлд сэтгэлийн дэмжлэг үзүүлсэн байна.
Түүний аав бөгөөд замналынх нь туршид агентаар нь ажиллаж ирсэн Хорхе Месси хүнд өвчний улмаас 8-р сарын 8-ны өдөр Росарио хотын эмнэлэгт 68 насандаа таалал төгссөн юм. Түүний нас барсан тодорхой шалтгааныг нууцалж байгаа бөгөөд эрүүл мэндийн байдал нь муудсан тухай мэдээлэл 2026 оны ДАШТ-ий үеэр буюу өнгөрсөн 6-р сард ил болж байв.
Аргентины шигшээ баг Алжирын эсрэг эхний тоглолтоо хийсний дараа Месси сэтгэл зүйн хүнд байдалд орон нулимс дуслуулж байсан бөгөөд хожим нь сэтгэл санааны хүнд өдрүүдийг туулж байгаагаа ярьж байсан билээ. Тухайн үед түүний аав эмчийн хяналтад эмчилгээ хийлгэж байсан юм.
