БНСУ-ын Ерөнхийлөгч асан Мүн Жэ Ин энэ сарын 23-нд Монгол Улсад айлчлахаар болсон талаар Солонгосын хэвлэлүүд мэдээлжээ. Түүний айлчлал найман шөнө, есөн өдөр үргэлжлэх бөгөөд гол хөтөлбөр нь НҮБ-ын Цөлжилттэй тэмцэх конвенцын 17 дугаар бага хуралтай холбогдож байна.
Мүн Жэ Ин наймдугаар сарын 24-нд COP17-ын нээлтийн арга хэмжээнд хүндэт зочноор оролцож, үг хэлэхээр төлөвлөжээ. Мөн Монгол Улсын Ерөнхийлөгч У.Хүрэлсүхийн хүндэт зоогт оролцох аж.
Айлчлалын үеэр төлөвлөгдсөн гол арга хэмжээнүүд:
- наймдугаар сарын 23-нд Монгол Улсад ирнэ;
- наймдугаар сарын 24-нд COP17-ын нээлтэд хүндэт зочноор үг хэлнэ;
- Ерөнхийлөгч У.Хүрэлсүхийн хүндэт зоогт оролцоно;
- наймдугаар сарын 26-нд “Энх тайван ойжуулалтын санаачилга” өндөр түвшний уулзалтад үндсэн илтгэл тавина;
- Тужийн нарсан ойд очиж, дурсгалын мод тарина.
Тэрбээр наймдугаар сарын 26-нд “Энх тайван ойжуулалтын санаачилга” буюу PFI-ын өндөр түвшний уулзалтад үндсэн илтгэл тавих юм байна. Энэ нь цөлжилт, газрын доройтол, ой нөхөн сэргээх асуудлыг бүс нутгийн хамтын ажиллагаатай холбох нэгэн чухал хөтөлбөр болох төлөвтэй байна.
Мөн айлчлалын хүрээнд Монголын хойд хэсэгт орших Тужийн нарсан ойд очихоор товложээ. Тэнд ой нөхөн сэргээх үйл ажиллагааг дэмжиж, дурсгалын мод тарих юм байна.
Энэхүү айлчлал нь Мүн Жэ Иний 2022 онд Ерөнхийлөгчийн албан тушаалаас бууснаас хойших хоёр дахь гадаад албан ёсны айлчлал ажээ. Ийнхүү БНСУ-ын Ерөнхийлөгч асан Мүн Жэ Ин COP17-ын хүрээнд Монголд ирж, цөлжилттэй тэмцэх, ойжуулалт, байгаль орчны хамтын ажиллагааны сэдвээр олон улсын хэлэлцүүлэгт оролцохоор байна.
