Метал урсгалын “Demon Hunter” хамтлаг өөрсдийн нэртэй төстэй “Kpop Demon Hunters” кино, түүнтэй холбоотой аялан тоглолтын улмаас “Netflix”-ийн эсрэг шүүхэд ханджээ. Хамтлагийн тал 25 жилийн турш дэлхий даяар уран бүтээлээ толилуулж ирсэн “Demon Hunter”-ийн нэр, үзэл санааг уг төсөл хэрэглэгчдэд төөрөгдөл үүсгэх хэмжээнд ашигласан гэж үзэж байна.
“Netflix” компани “Kpop Demon Hunters” кинонд түшиглэн дэлхийг тойрон аялан тоглолт зохион байгуулахаар болсон нь маргааны гол шалтгаан болжээ. Үүнтэй холбоотойгоор “Demon Hunter” хамтлагийн гэрээт компани “Hyde Lane” наймдугаар сарын 18-нд “Netflix Studios” болон тоглолтын зохион байгуулагч “AEG Presents” компанийг шүүхэд өгсөн байна.
Нэхэмжлэлийн үндэслэл болсон нэгэн тохиолдолд бага насны хүүхэд “Demon Hunter” хамтлагийн тоглолтын тасалбарыг “Kpop Demon Hunters”-тай андуурч худалдаж авчээ. Эцэг эх нь уг тоглолтыг хүүхдэд тохиромжтой гэж ойлгон, мэдэлгүйгээр 500 ам.доллараар тасалбар авсан байна. Энэ тухай гомдол мэдүүлсэн цахим шууданг хамтлагийн тал шүүхийн материалдаа хавсаргажээ.
Маргаанд дурдагдсан төөрөгдлийн жишээнүүд:
- хүүхдийн эцэг эх “Demon Hunter”-ийн тоглолтыг “Kpop Demon Hunters”-тай андуурч 500 ам.долларын тасалбар авсан;
- нэгэн телевизийн продюсер хамтлагийг “Kpop Demon Hunters” гэж ойлгон холбогдсон;
- цахим сүлжээнд “Demon Hunter”-ийг уг бүтээлтэй андуурч таг хийх тохиолдол гардаг;
- “Hyde Lane” компани “Netflix Studios”, “AEG Presents”-ийг хэрэглэгчдийн дунд төөрөгдөл үүсгэсэн гэж буруутгаж байна.
“Demon Hunter” хамтлаг түрэмгий өнгө аястай хэрнээ сэтгэл хөдлөлийн илэрхийлэл ихтэй хүнд метал урсгалаар уран бүтээл туурвидаг. Тэд өнгөрсөн оны есдүгээр сард 12 дахь цомгоо гаргасан бөгөөд “Spotify” дээр тогтмол 350 мянга орчим сонсогчтой аж.
Харин “KPop Demon Hunters” нь сардаа тогтмол 27 сая сонсогчтой гэж мэдээлжээ. Ийм хэмжээний танигдсан байдал, “Netflix”-ийн кино болон аялан тоглолтын нэршил нь хамтлагийн нэртэй холилдох эрсдэлтэй гэж нэхэмжлэгч тал үзэж байна.
“Demon Hunter” хамтлаг “Netflix”-ээс “KPop Demon Hunters” нэрийг хөгжим, тоглолт, бараа бүтээгдэхүүнд ашиглахаа зогсоохыг шаарджээ. Мөн тэд тодорхойгүй хэмжээний хохирлыг барагдуулахыг хүссэн байна.
