Үндэсний их баяр наадмын хүчит бөхийн барилдааны нэгийн даваа Төв цэнгэлдэх хүрээлэнд албан ёсоор эхэллээ. Энэ жилийн 1024 бөхийн барилдааны эхлэл тун ч сонирхолтой, гэнэтийн үйл явдлаар дүүрэн байна. Нэгийн даваанд бөхийн таавар эвдсэн хэд хэдэн барилдаан гарч, улсын цолтой дөрвөн бөх залуу болон сумын цолтой бөхчүүдэд өвдөг шороодлоо.
Нэгийн давааны дуулиантай барилдаанууд
Хүчит бөхийн барилдааны эхний даваанд олны танил, туршлагатай улсын начингууд залуу халаадаа унаж, наадамчин олныг гайхшруулав. Тодруулбал, дараах дөрвөн улсын начин нэгийн даваанаас наадмаа өндөрлүүллээ.
- Улсын начин Ц.Анхбаяр (Сүхбаатар аймгийн Баяндэлгэр сумын харьяат) – Залуу бөх А.Сугар-Очирт өвдөг шороодов.
- Улсын начин Б.Суманчулуун (Говь-Алтай аймгийн Тонхил сумын харьяат) – Залуу бөх Л.Энхболдод унажээ.
- Улсын начин С.Даваасамбуу (Увс аймгийн Сагил сумын харьяат) – Сумын начин С.Чадраабалд унаж, наадмаа дуусгав.
- Улсын начин Х.Цогтгэрэл (Булган аймгийн Хутаг-Өндөр сумын харьяат) – Сумын заан Г.Хангарьдад өвдөг шороодсон байна.
Барилдаанд зодоглоогүй бөхчүүд
Мөн энэ өдрийн барилдааны оноолтод нэр нь байсан ч зүлэг ногоон дэвжээнд гарч барилдаагүй бөхчүүд байлаа. Архангай аймгийн Батцэнгэл сумын харьяат Улсын харцага Г.Батбаяр, Баян-Өлгий аймгийн Булган сумын харьяат Улсын начин Б.Баатарцол нар энэ өдрийн барилдаанд зодоглосонгүй.
Наадмын хүчит бөхийн барилдааны дараах даваанууд үргэлжлэн явагдаж байгаа бөгөөд бид явцын мэдээллийг цаг тухайд нь шуурхай мэдээлэх болно.
