Table of Contents
“Miss Grand International 2026” тэмцээнд Монгол Улсын нэрийн өмнөөс оролцож буй Амбер Юуханы статустай холбоотой маргаан шийдэгдээгүй хэвээр байна. Монголын талаас түүнийг тэмцээнээс хасуулах хүсэлт хүргүүлсэн гэх мэдээлэл байгаа ч зохион байгуулагчид одоогоор эцсийн шийдвэрээ зарлаагүй бөгөөд тэрбээр “Miss Grand Mongolia” туузтайгаар тэмцээний хөтөлбөрт оролцсоор байгаа аж.
Эх сурвалжид Амбер Юуханыг БНХАУ-ын иргэн гэж мэдээлсэн бөгөөд түүнийг Монголын төлөөлөгчөөр сонгосон үйл явцыг дотоодын загварын салбарын зарим төлөөлөл болон төрийн байгууллагууд эсэргүүцэж байгаа юм.
Монголын талаас зохион байгуулагчдад шаардлага хүргүүлсэн гэжээ
Маргаан нь “Miss Grand International”-ийн Монгол дахь лиценз болон төлөөлөгчийг сонгосон журмаас үүдэлтэй гэж эхэд дурдсан байна. Соёл, спорт, аялал жуулчлал, залуучуудын яам, Гадаад харилцааны яам болон салбарын зарим төлөөлөгч Тайландын талд дипломат шугамаар хандаж, Амбер Юуханы оролцоог зогсоох хүсэлт гаргасан гэх мэдээлэл бий.
Харин тэмцээн зохион байгуулагчдын зүгээс асуудлыг дотооддоо нягталж байгаа гэх тайлбар өгсөн ч оролцогчийн статуст одоогоор өөрчлөлт ороогүй байна.
Тайландын үзэгчид түүнийг өмнөөс нь мэддэг байжээ
Амбер Юухан өмнө нь “Miss Grand China 2026” тэмцээнд тэргүүн дэд байр эзэлж байсан гэх мэдээлэлтэй. Тиймээс Тайланд дахь гоо сайхны тэмцээн сонирхогчдын дунд хэдийн танигдсан байсан бөгөөд тус улсад очиход нь зарим дэмжигч цэцэг, бэлэгтэй угтсан байна.
Өдгөө Тайланд дахь фен хуудсууд болон гоо сайхны тэмцээний сошиал сувгууд түүний зураг, бичлэгийг идэвхтэй түгээж, тайзны үзүүлбэрүүдийг нь дэмжиж байгаа аж. Ийнхүү Монголын талд маргаан дагуулсан оролцоо Тайландын зарим үзэгчийн дунд харин дэмжлэг авч байгаа дүр зурагтай байна.
Финал аравдугаар сарын 10-нд болно
“Miss Grand International 2026”-ийн гранд финалыг Бангкок хотын MGI Hall-д аравдугаар сарын 10-нд зохион байгуулахаар товложээ.
Финал хүртэл Амбер Юуханы “Miss Grand Mongolia” статуст өөрчлөлт орох эсэх, Монголын талаас хүргүүлсэн гэх шаардлагад зохион байгуулагчид ямар хариу өгөх нь тодорхойгүй хэвээр байна.
2 comments
монголын тусгаар тогтнолд аюул заналхийлж байгаагаа илэрхийлсэн байна харахаас сэжиг хүрмээр хужаа царай вэ
монголыг заналхийлж байгаагийн илрэл. эсэргүүцэх хэрэгтэй