Алдартай поп од Дуа Липа болон жүжигчин Каллум Тёрнер нар гэрлэлтээ албан ёсоор батлуулж, хуримын зургуудаараа цахим ертөнцийг шуугиулж эхэллээ. Хосууд зургаадугаар сарын 1-ний өдөр Их Британийн нийслэл Лондон хотын ”Old Marylebone Town Hall”-д гэр бүл, ойр дотныхоо хүрээнд тун нууцлаг, цомхон хэмжээний ёслол үйлдсэн байна. Тэдний гэнэтийн хуримын гэрэл зургууд өчигдрөөс эхлэн олон нийтийн сүлжээнд хүчтэй тархаж, шүтэн бишрэгчдийг нь гайхшруулаад байгаа юм.
Тэдний хайрын түүх 2024 оны нэгдүгээр сард Лондон хотын “River” хэмээх тохилог кафед анх танилцсанаар эхэлсэн түүхтэй. Бие биедээ анхны харцаар татагдсан хосууд харилцаагаа албан ёсоор баталгаажуулж, сүй тавьсан тухайгаа Дуа Липа өнгөрсөн жил British Vogue сэтгүүлд өгсөн ярилцлагадаа анх удаа нээлттэй хуваалцаж байв. Тэрбээр ирээдүйн ханьдаа зориулж “Тийм ээ, бид сүй тавьсан. Хамтдаа хөгширч, ирээдүйгээ төсөөлнө гэдэг үнэхээр догдлом. Насан туршийн хамгийн сайн найзтайгаа ийм шийдвэр гаргана гэдэг маш онцгой мэдрэмж” хэмээн сэтгэлийн үгээ хэлж байжээ.
Лондонд болсон цомхон ёслол нь тэдний баяр хөөрийн зөвхөн эхлэл бөгөөд хосууд илүү нүсэр баяр зохион байгуулахаар зэхэж байгааг ойрын эх сурвалж нь онцолсон байна. Тэд Европын хамгийн үзэсгэлэнтэй бүс нутагт хуримаа үргэлжлүүлэхээр төлөвлөсөн бөгөөд ирэх өдрүүдэд хийгдэх ёслолын талаарх зарим мэдээллийг доор дурджээ.
- Хуримын гол арга хэмжээ болох газар: Италийн Сицили арал
- Баярын үйл ажиллагаа үргэлжлэх хугацаа: Нийт гурван өдрийн турш
- Зочдын нэрс болон тодорхой товлогдсон өдөр: Одоогоор чанд нууцалж байна
Энэхүү томоохон хэмжээний баярт дэлхийн олон алдартай одод уригдан ирэх магадлалтай байгаа ч зохион байгуулагчид аюулгүй байдал болон хувийн орон зайг хамгаалах үүднээс нууцыг чадмаг хадгалсаар байна.
