Table of Contents
Олон улсын хөлбөмбөгийн холбоо /ФИФА/ 2026 оны аравдугаар сарын 7-нд эрэгтэй үндэсний шигшээ багуудын шинэчилсэн чансааг зарлалаа. Монгол Улсын шигшээ 211 гишүүн холбооноос 190 дүгээр байрт бичигдэж, ДАШТ-ий дараах өмнөх чансаан дахь байр сууриа хадгалжээ.
Шинэ чансаанд есдүгээр сарын 21-нээс аравдугаар сарын 6-ны хооронд болсон шигшээ багуудын тоглолтын үр дүнг тооцсон байна. Энэ хугацаанд ихэнх баг 2–4 тоглолт хийсэн бол ердөө найман улсын шигшээ нэг ч тоглолт хийгээгүй бөгөөд тэдний нэг нь Монгол байв.
Шигшээ багийн тоглолт тасалдаад удаж байна
Үндэсний шигшээ баг тогтмол тоглох нь тоглогчдын туршлага, өрсөлдөөний түвшинд төдийгүй хүүхэд, залуусын хөлбөмбөгийн сонирхол, хөгжөөн дэмжигчдийн оролцоонд чухал нөлөөтэй. Гэвч Монголын шигшээ сүүлийн үед нөхөрсөг тоглолт бараг хийхгүй байгаа нь шүүмжлэл дагуулж байна.
2024 оноос хойш “Талын хөх чононууд” хочит Монголын шигшээ ердөө хоёр нөхөрсөг тоглолт хийсэн байна. Энд тив, дэлхийн аваргын урьдчилсан болон сонгон шалгаруулах тэмцээний тоглолтыг тооцоогүй юм.
26 жилд 14 нөхөрсөг тоглолт хийжээ
2000 оноос хойших 26 жилийн хугацаанд Монголын шигшээ нийт 14 нөхөрсөг тоглолт хийсэн байна. Үүнээс:
- 2 хожил
- 3 тэнцээ
- 9 хожигдол
бүртгэжээ.
Энэ нь дунджаар бараг хоёр жилд нэг нөхөрсөг тоглолт хийсэн үзүүлэлт юм.
Чансааны доогуур орнууд ч тоглолт хийсээр байна
ФИФА-гийн чансааны 211 дүгээр байрт бичигддэг Сан Марино, мөн Ангилья, Британийн Виржинийн арлууд, Бахам, Лихтенштэйн зэрэг чансааны доод хэсгийн багууд ч тоглолт хийсээр байгаа нь Монголын шигшээ багийн идэвхгүй байдалтай харьцуулахад анхаарал татаж байна.
Мөн Сомали, Палестин зэрэг улс ч шигшээ багийн тоглолтоо үргэлжлүүлж байгаа бөгөөд энэ нь үндэсний багийн тоглолт зөвхөн үр дүн бус, олон нийтийн сонирхол, хөлбөмбөгийн орчныг хадгалах ач холбогдолтойг харуулж байна.
Монголын шигшээ тив, дэлхийн аваргын урьдчилсан шатнаас эрт хасагдах тохиолдол олон байдаг тул нөхөрсөг тоглолтын тоог нэмэгдүүлэх нь хөгжөөн дэмжигчдэд шигшээгээ тогтмол үзэх, тоглогчдод олон улсын туршлага хуримтлуулах нэг боломж хэвээр байна.
