БНХАУ-ын Өвөр Монголын Өөртөө Засах Орны Ордос хотноо долдугаар сарын 9–12-ны өдрүүдэд хөнгөн атлетикийн 23 хүртэлх насны (U23) залуучуудын Азийн аварга шалгаруулах анхдугаар тэмцээн амжилттай зохион байгуулагдлаа. Азийн 27 орны 560 гаруй шилдэг тамирчин хурд хүч, ур чадвараа сорьсон тус тэмцээнд МУБИС-ийн Биеийн тамирын сургуулийн оюутан тамирчид Монгол Улсын шигшээ багийн бүрэлдэхүүнд багтан эх орноо төлөөлөн амжилттай оролцов.
Ц.Мөнххэрлэнгийн түүхэн амжилт: Хоёр төрөлд улсын дээд амжилтыг шинэчлэв
Тэмцээний үеэр МУБИС-ийн тамирчин, Спортын мастер Цоодлын Мөнххэрлэн ойрын зайн гүйлтийн хоёр төрөлд Монгол Улсын дээд амжилтыг шинэчлэн тогтоож, онцгой амжилт гаргалаа.
- 200 метрийн зайд: Урьдчилсан шатанд 24.52 секунд хурдалж, шийдвэрлэх финалд шалгарахын зэрэгцээ Монгол Улсын эмэгтэйчүүдийн 200 метрийн улсын дээд амжилтыг шинэчлэн тогтоов.
- 400 метрийн зайд: Тус зайд 54.97 секунд гүйснээр Монгол Улсын насанд хүрэгчдийн болон “U23” насны улсын дээд амжилтыг зэрэг шинэчилж, Олон улсын хэмжээний спортын мастер (ОУХМ) цолны болзол хангалаа.
Нэг тэмцээний хүрээнд ийнхүү хоёр өөр зайд улсын дээд амжилтыг шинэчилсэн нь Монголын ойрын зайн гүйлтийн спортын хөгжилд гарсан томоохон ахиц, бахархам амжилт болж байна.
Эх орноо төлөөлөн оролцсон МУБИС-ийн тамирчид
Нийт 14 улс медаль хүртсэн тус нэр хүндтэй тэмцээнд МУБИС-ийн Биеийн тамирын сургуулиас дараах оюутан тамирчид амжилттай өрсөлдсөн юм.
- Б.Сувд-Эрдэнэ – Уртын харайлтын төрөлд,
- Хонгорзул – 800 метр болон 1500 метрийн зайн гүйлтэд,
- Ц.Мөнххэрлэн – 200 метр болон 400 метрийн зайн гүйлтэд,
- Д.Отгон-Эрдэнэ – 100 метр болон 200 метрийн зайн гүйлтэд тус тус хүч үзлээ.
Олон улсын тавцанд эх орныхоо нэрийг цуурайтуулж, түүхэн амжилт гаргасан залуу тамирчдадаа баяр хүргэж, цаашдын спорт замналд нь улам их амжилт хүсье.
