Table of Contents
Монголын театрын урлагийн түүхэнд шинэ хуудас нээж, үндэсний драмын шилдэг бүтээл “Монгол Хаан” жүжгийг дэлхийн театрын урлагийн олимп гэгддэг Нью-Йорк хотын “Broadway”-н тайзнаа англи хэлээр толилуулахаар боллоо.
Энэхүү түүхэн хамтын ажиллагааны албан ёсны санамж бичигт Монголын “Hero Entertainment” продакшны найруулагч Херо Баатар болон дэлхийн тэргүүлэгч театрын сүлжээ “Nederlander Group”-ийн ерөнхий захирал Боб Недерландер нар гарын үсэг зурлаа. Ингэснээр жүжгийг англи хэлээр “Broadway”-д толилуулах бэлтгэл ажил албан ёсоор эхэлж байна.
Наадмаар ирсэн зочдын нууц “шалгалт”
Энэхүү шийдвэрийг гаргахын өмнө “Nederlander Group”-ийн ерөнхий захирал Боб Недерландер болон “Broadway”-н нэрт продюсер, ерөнхий менежер Дон Франц нар энэ сарын (2026 оны 7 дугаар сарын) 10-14-ний өдрүүдэд Монгол Улсад биечлэн айлчилсан юм.
Тэдний айлчлал нь ердийн танилцах уулзалт бус, харин жүжгийг “Broadway”-д тоглуулах эсэхийг шийдвэрлэх хариуцлагатай сонгон шалгаруулалт байв. Төлөөлөгчид баяр наадмын өдрүүдэд “Монгол Хаан” жүжгийг эх оронд нь үзэж сонирхоод, дараах шалгууруудыг цогцоор нь үнэлжээ.
- Уран бүтээлийн уран сайхны түвшин, тайзны шийдэл
- Жүжигчдийн ур чадвар болон хэлний бэлтгэл
- Хөгжмийн найруулга, арилжааны боломж
- Олон улсын үзэгчдэд хүрэх үнэ цэн, нөлөөлөл
Шалгаруулалтын дүнд “Монгол Хаан” жүжиг олон улсын хамгийн өндөр шалгуурыг бүрэн давж, Бродвейн тайзнаа гарах эрхээ авч чадлаа.
Дэлхийн хэмжээний “Nederlander Group” ба “Монгол Хаан”-ы аялал
1912 онд үүсгэн байгуулагдсан “Nederlander Group” нь өдгөө 114 жилийн түүхтэй, дэлхийн хамгийн том хувийн өмчит энтертайнмент байгууллагуудын нэг юм. Тус групп Нью-Йорк хотын Бродвейн 9 театр, Лондонгийн Вест-Эндийн 3 театр, Чикаго хотын 5 театр зэрэг нийт 30 гаруй нэр хүндтэй театрын олон улсын сүлжээг эзэмшдэг бөгөөд өмнө нь Hamilton, The Lion King, Wicked, Cats зэрэг дэлхийн хэмжээний шилдэг бүтээлүүдийг үзэгчдэд хүргэж байжээ.
Ардын уран зохиолч Б.Лхагвасүрэнгийн “Тамгагүй төр” жүжгээс сэдэвлэн бүтээсэн “Монгол Хаан” жүжгийн олон улс дахь аялал амжилтаар дүүрэн үргэлжилж байна.
- 2023 он: Лондон хотын “London Coliseum” театрт дэлхийн нээлтээ хийж, 17 тоглолтоор 40 гаруй мянган үзэгчийг байлдан дагуулав.
- 2024 он: Сингапурын “Marina Bay Sands” театрт Азийн нээлтээ амжилттай зохион байгуулав.
- 2025 он: Япон улсад аялан тоглолтоо амжилттай хийв.
- 2026 оны 9 дүгээр сар: ОХУ-ын алдарт Марийнскийн театрын урилгаар Владивосток хотод болох IV Олон улсын Номхон далайн театрын наадмын нээлтийн уран бүтээлээр уригдан тоглогдоно.
Азийн 5 дахь улс: Монгол Улс Бродвейн түүхэнд нэрээ бичнэ
Бродвейн тайзнаа шинэ уран бүтээл тоглуулах эрх авах нь театрын салбарын хамгийн хүнд даваануудын нэг байдаг. Түүхэндээ Ази тивээс Хятад, БНСУ, Филиппин, Япон гэсэн ердөө дөрөвхөн улс өөрийн бүтээлээ Бродвейн тайзнаа толилуулж байжээ.
Харин “Монгол Хаан” жүжиг тоглогдсоноор Монгол Улс тус нэр хүндтэй тайзнаа үндэсний бүтээлээ гаргасан Азийн 5 дахь улс болж түүхэнд нэрээ данслах юм.
“Монгол Хаан бол зөвхөн Монголын төдийгүй дэлхийн үзэгчдэд хүрэх ёстой хэмжээний бүтээл гэж бид үзсэн.”
— Боб Недерландер, “Nederlander Group”-ийн ерөнхий захирал
“Энэ бол зөвхөн нэг жүжгийн амжилт биш. Монголын театрын урлаг дэлхийн хамгийн өндөр босготой тайзанд гарч буй түүхэн мөч юм.”
— Херо Баатар, “Hero Entertainment”-ийн найруулагч
Монгол зохиол, Монгол найруулга, Монголын 100 гаруй авьяаслаг уран бүтээлчдийн хамтын хөдөлмөр шингэсэн энэхүү бүтээл дэлхийн тайзнаа эх орноо сурталчлах соёлын хамгийн том гүүр болж байна.
