Нийслэлийн МАН-ын Тэргүүлэгчдийн ээлжит хуралдаан өнөөдөр 15.00 цагт албан ёсоор эхэлж, хотын дараагийн Засаг даргад хэнийг дэвшүүлэх асуудлыг хөндөн хэлэлцлээ. Уг хуралдаанаар намын Удирдах зөвлөлөөс гаргасан шийдвэрийг танилцуулсан бөгөөд хотын даргад Б.Пүрэвдагвын нэрийг дангаар нь санал болгож, тэргүүлэгчдэд танилцуулсан байна. Үүнтэй холбогдуулан Нийслэлийн МАН-ын хорооны өргөтгөсөн хурлыг энэ сарын 25-ны өдөр зохион байгуулахаар товлосон бөгөөд тус хуралдаанаар нэр дэвшигчийн асуудлыг эцэслэн шийдвэрлэхээр тогтжээ.
Улаанбаатар хотын захирагчийг томилох үйл ажиллагаа нь хууль эрх зүйн тодорхой үе шаттайгаар хэрэгждэг зохицуулалттай. Энэхүү улс төрийн чухал шийдвэрийг гаргахад намын дотоод бүтэц болон төрийн байгууллагуудын харилцан хамаарал бүхий дараах дараалал мөрдөгддөг байна:
- Намын Удирдах зөвлөл шиг улс төрийн чухал алхам хийдэг, 23 гишүүний бүрэлдэхүүнтэй Нийслэлийн МАН-ын тэргүүлэгчид эхлээд нэр дэвшигчийг хэлэлцэж дэмжлэг үзүүлнэ.
- Тэргүүлэгчдээс ногоон гэрэл авсан нэр дэвшигчийн саналыг Нийслэлийн Иргэдийн Төлөөлөгчдийн Хуралд (НИТХ) оруулж, төлөөлөгчдийн дунд санал хураалт явуулдаг.
- НИТХ-ын шийдвэрийг үндэслэн нийслэлийн Засаг даргаар томилуулах саналаа Монгол Улсын Ерөнхий сайдад өргөн мэдүүлэх бөгөөд гүйцэтгэх засаглалын тэргүүн батламжилснаар албаждаг.
Хотыг удирдуулахаар нэрийг нь дэвшүүлээд буй Б.Пүрэвдагва нь 1990 онд төрсөн, намын дунд шатны шилдэг залуу боловсон хүчнүүдийн нэг юм. Тэрбээр тэртээ 2009 онд Монгол Ардын Намд гишүүнээр элсэж байсан түүхтэй бөгөөд өдгөө МАН-ын дэргэдэх Социал Демократ Монголын Залуучуудын Холбооны (СДМЗХ) ерөнхийлөгчийн албан тушаалыг хашиж байна.
