НҮБ-ын Аялал жуулчлалын байгууллагаас (UN Tourism) 2026 оны эхний улирлын дэлхийн аялал жуулчлалын салбарын статистик мэдээллийг албан ёсоор танилцууллаа. Тус тайланд дурдсанаар, Монгол Улсыг зорин ирсэн гадаадын жуулчдын урсгал урьд өмнө байгаагүй өндөр хурдаар нэмэгдэж, олон улсын тавцанд хүчтэй шуугиан тарьж байна.
Дэлхийн шилдэг өсөлттэй ТОП-4 чиглэл
Манай улсын хүлээн авсан олон улсын жуулчдын тоо 2025 оны mөн үетэй харьцуулахад 39 хувиар өссөн үзүүлэлттэй гарчээ. Энэхүү үсрэнгүй амжилтаараа Монгол Улс “Дэлхийн хамгийн сайн өсөлттэй 20 зорин очих чиглэл”-ийн жагсаалтын дөрөвдүгээр байрт бичигдсэн байна. Түүнчлэн Ази, Номхон далайн бүс нутагтаа Шинэ Каледонийн дараа хоёрдугаар байрт эрэмбэлэгдэж, бүсийнхээ гол тоглогч болохоо харууллаа.
Дэлхийн хэмжээнд хамгийн өндөр өсөлт үзүүлсэн эхний дөрвөн улсыг дурдвал:
- Парагвай: +46%
- Шинэ Каледони: +45%
- Эль Сальвадор: +43%
- Монгол Улс: +39%
Өсөлтийн гол хөшүүрэг ба ирээдүйн зорилт
Энэхүү эрчимтэй өсөлт нь зүгээр нэг тохиолдол биш бөгөөд Монгол Улсын Засгийн газраас сүүлийн жилүүдэд тууштай хэрэгжүүлж буй аялал жуулчлалын оновчтой бодлогын бодит үр дүн гэдгийг салбарынхан онцолж байна. Олон улсын зах зээлд чиглэсэн идэвхтэй сурталчилгаа, аяллын бүтээгдэхүүнүүдийг төрөлжүүлсэн байдал болон жуулчдыг хүлээн авах үйлчилгээний чанарыг сайжруулахад гаргасан хичээл зүтгэл ийнхүү дэлхийн хэмжээнд үнэлэгдлээ.
Цаашид манай улс энэ эрчээ алдахгүйгээр дараах үндсэн зорилтуудад анхаарлаа хандуулахаар төлөвлөж байна:
- Тогтвортой болон хариуцлагатай аялал жуулчлалын нэгдсэн тогтолцоог бэхжүүлэх
- Жуулчдын урсгалыг зөвхөн зунаар хязгаарлахгүй, жилийн дөрвөн улиралд тэнцвэржүүлэх
- Орон нутгийн иргэдийн эдийн засгийн үр өгөөж, амьжиргааг дэмжих менежментийг эрчимжүүлэх
