Сингапур төрөлтийн түвшин буурч, дэлхийн хамгийн хурдан хөгширч буй улсуудын нэг болж байгаатай холбоотойгоор гэр бүлүүдийг олон хүүхэдтэй болохыг дэмжих шинэ багц арга хэмжээ танилцууллаа. Financial Times-ийн мэдээлснээр, эцэг эхчүүд хүүхэд бүрт 55 мянга гаруй ам.долларын дэмжлэг авах боломжтой болно.
Ерөнхий сайд Лоуренс Вонг 8-р сарын 23-ны жил тутмын мэдэгдэлдээ хүүхдийн мөнгөн тэтгэмж болон хүүхэд асрах чөлөөний системийг шинэчлэхээ зарласан байна. Түүний хэлснээр, засгийн газар хүүхэдтэй болохыг хүсэж буй сингапурчуудад гэр бүл зохиож, хүүхдээ өсгөхөд нь илүү хялбар нөхцөл бүрдүүлэхийг зорьж байна.
Төрөлтийн түвшин рекорд доод хэмжээнд хүрчээ
Сингапурын хүн ам 6 саяас арай давсан байна. 2025 онд тус улсад нэг эмэгтэйд ногдох төрөлтийн түвшин 0.87 болж, түүхэн доод хэмжээнд хүрчээ. Энэ үзүүлэлт 2024 онд 0.97 байсан байна.
Харьцуулбал, дэлхийн хамгийн бага төрөлтийн түвшин Өмнөд Солонгост бүртгэгдсэн бөгөөд нэг эмэгтэйд 0.8 хүүхэд ногдож байна. Харин хүн амыг цэвэр цагаачлалгүйгээр тогтвортой хадгалахад нэг эмэгтэйд 2.1 хүүхэд ногдох шаардлагатай гэж хүн ам зүйчид үздэг.
Төрөлт буурч, эрүүл мэндийн салбарын ахицын ачаар дундаж наслалт уртассан нь Сингапурыг энэ онд “хэт хөгшин” нийгэм болох замд оруулжээ. НҮБ-ын тодорхойлолтоор хүн амын 21%-иас илүү нь 65-аас дээш настай бол тухайн улсыг ийм ангилалд оруулдаг. 2030 он гэхэд дөрвөн сингапур хүн тутмын нэг нь энэ насны босгыг давна гэж таамаглаж байна.
Хүүхэд бүрт 70 мянган сингапур долларын шууд дэмжлэг үзүүлнэ
“Хэрэв та хүүхэдтэй болохоор шийдвэл засгийн газар таньтай хамт байна гэдгийг гэр бүл бүр мэдээсэй гэж бид хүсэж байна. Бид илүү олон жилийн турш илүү том дэмжлэг үзүүлнэ” гэж Вонг мэдэгджээ.
Түүний хэлснээр, засгийн газар хүүхэд бүрт 17 нас хүртэл нь бараг 70 мянган сингапур доллар буюу 55.15 мянган ам.долларын шууд санхүүгийн дэмжлэг олгоно. Үүнд төрөх үеийн 10 мянган долларын бэлэг болон цаашдын боловсролд зориулсан 10 мянган долларын төлбөр багтаж байна.
Мөн хүүхэд асрах тэтгэмжийг өргөжүүлж, ялангуяа олон хүүхэдтэй гэр бүлүүдэд илүү дэмжлэг үзүүлэхээр болжээ. Энэ зардлын үндсэн хэсгийг ажил олгогчдын өмнөөс засгийн газар хариуцах юм. Үүнээс гадна хүүхэдтэй гэр бүлүүд анхны орон сууцаа худалдан авахад илүү хялбар нөхцөл бүрдүүлнэ.
Гэсэн ч Вонг төрөлтийн түвшин хүн амыг нөхөн хадгалах хэмжээнээс мэдэгдэхүйц доогуур хэвээр байх магадлалтайг хүлээн зөвшөөрсөн байна. “Хэрэв бид зөвхөн төрөлтөнд найдах юм бол манай хүн амын тоо буурна” гэж тэр хэлжээ.
Иймээс Сингапур хүн амын өсөлтийг цагаачлалаар нөхөх уламжлалт бодлогоо үргэлжлүүлэхээр байна. Вонгийн хэлснээр, засгийн газар шинэ иргэдийг “хэмжээтэй, тогтвортой хурдаар” хүлээн авч, сингапурчууд улсдаа олонх хэвээр байхыг баталгаажуулахыг зорих аж.
