Өмнөд Солонгосын ерөнхийлөгч асан Юн Сук Ёл-д цаазын ял оноохыг прокурорууд давж заалдах шатны шүүх хурал дээр дахин шаарджээ. Тэрээр 2024 онд цэргийн онц байдал зарлаж, төрийн эрхийг хууль бусаар хадгалахыг оролдсон гэх хэрэгт анхан шатны шүүхээс бүх насаар нь хорих ял сонссон юм.
Тусгай прокурор Чо Ын Сог-ийн ахалсан баг аравдугаар сарын 29-нд Сөүлийн Давж заалдах шатны шүүхэд болсон хурлын үеэр Юн Сук Ёлын үйлдэл Өмнөд Солонгосын ардчилсан тогтолцоонд ноцтой аюул учруулсан гэж үзсэн байна.
Прокурорууд анхан шатны шүүхийн хэлэлцүүлгийн үеэр ч цаазын ял хүсэж байсан ч шүүх бүх насаар нь хорих ял оноосон. Харин давж заалдах шатанд тэд өмнөх байр сууриа дахин илэрхийлжээ.
Ёнхап агентлагийн мэдээлснээр прокурор:
“Цаазын ял оноохоос татгалзах ямар ч шалтгаан байхгүй”
гэж мэдэгдсэн байна.
1997 оноос хойш цаазын ял гүйцэтгээгүй
Өмнөд Солонгосын хуульд цаазын ял хэвээр байдаг ч 1997 оноос хойш нэг ч цаазаар авах ялыг гүйцэтгээгүй байна.
Гэсэн хэдий ч өнгөрсөн хугацаанд ийм ял хэрэгжүүлээгүй явдал нь Юн Сук Ёлд цаазын ял оноох боломжийг үгүйсгэх үндэслэл болохгүй гэж прокурорын тал үзжээ.
Хэрэг 2024 оны арванхоёрдугаар сарын 3-нд Юн Сук Ёл цэргийн онц байдал зарласнаас эхэлсэн. Тухайн үед парламентын ордон руу цэрэг болон цагдаагийн хүч илгээж, парламентын үйл ажиллагааг хязгаарлах оролдлого хийсэн гэж прокурорууд үздэг.
Сөрөг хүчний давамгайлсан парламентын гишүүд хамгаалалтын бүслэлтийг даван орж, цэргийн онц байдлыг цуцлах тогтоол баталсан бөгөөд ойролцоогоор зургаан цагийн дараа засгийн газар уг шийдвэрээ буцаасан байна.
Анхан шатны шүүх:
“Юн Сук Ёлыг парламентын хэвийн үйл ажиллагааг тасалдуулах, улс төрийн өрсөлдөгчдөө баривчлах, төрийн эрхийг удаан хугацаанд хадгалан үлдэхийг оролдсон”
гэж дүгнэсэн байдаг.
Өмгөөлөгчид өөр тайлбар өгч байна
Юн Сук Ёлын өмгөөлөгчид түүнийг дарангуйллын дэглэм тогтоох зорилгогүй байсан гэж тайлбарлажээ.
Тэдний байр сууринаас үзвэл цэргийн онц байдал зарласан шалтгаан нь сөрөг хүчний хяналтад байсан парламент засгийн газрын үйл ажиллагаанд саад учруулж байгааг олон нийтэд анхааруулах зорилготой байсан аж.
Юн Сук Ёл өөрөө ч аравдугаар сарын 27-нд болсон шүүх хурал дээр урт хугацааны дарангуйлал тогтоохыг зорьсон гэх мэдэгдлийг няцаасан байна.
Уг хэрэгтэй холбоотой улс төрийн хямралын дараа парламент 2024 оны арванхоёрдугаар сард түүнийг огцруулах шийдвэр гаргасан. Үүний дараа Өмнөд Солонгосын Үндсэн хуулийн цэц 2025 оны дөрөвдүгээр сард ерөнхийлөгчийн албан тушаалаас нь албан ёсоор огцруулжээ.
Давж заалдах шатны шүүх хурал цаашид дахин хоёр удаа үргэлжлэхээр байгаа бөгөөд арваннэгдүгээр сарын 5-нд Юн Сук Ёл өөрийн эцсийн байр суурийг илэрхийлэхээр товлогдсон байна.
