Өмнөд Солонгосын шарсан тахиа олон жилийн турш дотоодын төдийгүй гадаадын жуулчдын дуртай хоолны нэг байсаар ирсэн. Харин энэ удаа Сөүлд зохион байгуулсан тусгай фестивалиар 400 метр урт ширээг зөвхөн шарсан тахианы хоолоор дүүргэж, олны анхаарлыг татжээ.
Сөүл хотын захиргаа аравдугаар сарын 25-нд Жамсу гүүр дээр шарсан тахианы фестиваль зохион байгуулсан байна. Арга хэмжээний үеэр гүүрийн автомашины хөдөлгөөнийг бүрэн хааж, зөвхөн явган зорчигчдод нээлттэй болгожээ.
Фестиваль нь “Машингүй Жамсу гүүр” арга хэмжээний хүрээнд зохион байгуулагдсан бөгөөд оролцогчдыг 16:00 болон 18:00 цагт хоёр ээлжээр хооллосон байна.
Ээлж бүрд ойролцоогоор 1000 хүн 400 метр үргэлжлэх урт ширээний дагуу сууж, төрөл бүрийн шарсан тахиа амталжээ. Ингэснээр нийтдээ 2000 орчим хүн уг өвөрмөц хоолны арга хэмжээнд оролцсон байна.
10 ресторан бүтээгдэхүүнээ нийлүүлжээ
400 метр урт ширээг дүүргэхийн тулд шарсан тахианы чиглэлээр үйл ажиллагаа явуулдаг 10 ресторан хамтран оролцсон байна.
Тэдний дунд “BBQ”, “Puradak”, “Mom’s Touch”, “Mexicana Chicken”, “Jadam Chicken” зэрэг томоохон франчайз сүлжээнүүд байсан бол “Manseok Dakgangjeong”, “Chicken Today”, “Banpo Chicken” зэрэг дотоодын ресторанууд ч бүтээгдэхүүнээ санал болгожээ.
Оролцогчид фестиваль эхлэхээс өмнө урьдчилан бүртгүүлж, дээрх ресторануудын цэснээс хүссэн төрлөө сонгосон байна.
Мөн хүмүүсийг сонгосон хоолоор нь ялгахын тулд өөр өөр өнгийн бугуйвч тараажээ. Ингэснээр зохион байгуулагчид олон мянган хүний захиалгыг нэг дор эмх цэгцтэй хүргэх боломж бүрдсэн байна.
Жамсу гүүрийг түр хугацаанд автомашингүй бүс болгож, хоол, соёл, нийтийн арга хэмжээг хослуулсан энэ фестиваль нь Сөүл хотын нийтийн орон зайг шинэ хэлбэрээр ашигласан сонирхолтой арга хэмжээ болжээ.
400 метрийн урт ширээнд мянга мянган порц шарсан тахиа өрсөн энэхүү фестиваль нь Өмнөд Солонгосын шарсан тахианы соёл ямар хэмжээний олон нийтийн арга хэмжээ болж өргөжсөнийг харуулсан байна.
