Аймаг, нийслэл, сум, дүүргийн Иргэдийн Төлөөлөгчдийн Хурлын 2026 оны нөхөн сонгуулийг зургаадугаар сарын 21-ний өдөр зохион байгуулахаар товлосон байна. Үүнтэй холбоотой бэлтгэл ажлыг шат дараатай эхлүүлж, орон нутгийн сонгуулийн байгууллагуудад чиглэл, арга зүйн дэмжлэг үзүүлж эхэлжээ.
Сонгуулийн ерөнхий хорооноос 2026 оны дөрөвдүгээр сарын 24-ний өдөр нөхөн сонгууль товлон зарласан аймаг, сумдын сонгуулийн хороо болон мэдээллийн технологийн багтай цахим хурал хийсэн байна. Уг хуралд Сонгуулийн ерөнхий хорооны Тамгын газрын дарга Д.Бат-Эрдэнэ, мөн холбогдох газар, хэлтэс, мэдээллийн технологийн газрын албан хаагчид оролцож, сонгуулийн зохион байгуулалтын асуудлаар мэдээлэл солилцсон аж.
Цахим хурлын үеэр нэр дэвшигчдийг бүртгэх үйл явц, сонгуулийн мэдээллийн цахим системийн ашиглалт, сонгогчдын идэвх оролцоог нэмэгдүүлэх чиглэлээр заавар, зөвлөмж өгчээ. Мөн оролцогчдын зүгээс тавьсан асуултад хариулж, зохион байгуулалтын шатанд анхаарах асуудлуудыг тодруулсан байна.
Сонгуулийн ерөнхий хорооноос байнгын бус ажиллагаатай сонгуулийн байгууллагын ажилтнуудад зориулсан сургалт, мэдээллийг тогтмол зохион байгуулдаг уламжлалтай. Энэ жилийн хувьд зөвхөн сонгуулийн хорооны ажилтнуудаар хязгаарлахгүйгээр улс төрийн намын анхан болон дунд шатны байгууллагуудад ч сургалт, мэдээлэл хийхээр төлөвлөжээ.
Үүнээс гадна нөхөн сонгууль товлон зарласан 16 аймагт мэдээлэл, сургалтын багийг дөрөвдүгээр сарын 27-ноос ажиллуулахаар болсон байна. Харин сумдын сонгуулийн хороодод зориулсан орон нутгийн сургалтыг тавдугаар сарын 3-наас эхлүүлэхээр товложээ.
- Нөхөн сонгууль зургаадугаар сарын 21-ний өдөр болно
- Цахим хурлыг 2026 оны дөрөвдүгээр сарын 24-ний өдөр зохион байгуулжээ
- 16 аймагт мэдээлэл, сургалтын баг дөрөвдүгээр сарын 27-ноос ажиллана
- Сумдын сонгуулийн хороодын сургалт тавдугаар сарын 3-наас эхэлнэ
