Улаанбаатар ₮1.7 их наядын бондоос ₮5.7 тэрбумын алдагдал хүлээжээ

УИХ-ын чуулганаар хэлэлцсэн Үндэсний аудитын дүгнэлтээс харахад Улаанбаатар хот 2024 онд олон улсын зах зээлээс 500 сая ам.долларын бонд гарган төвлөрүүлсэн ч түүний ихэнх хэсгийг арилжааны банкнуудад хадгалуулсан бөгөөд улмаар 5.7 тэрбум төгрөгийн алдагдалд оржээ.

Бондын гол зорилго нь “Сэлбэ дэд төв”-д суурилсан гэр хорооллын дахин төлөвлөлтийн төсөл байв. Гэвч уг төсөл эхлээгүй тул 500 сая ам.доллараас 400 саяыг нь дотоодын 7 банканд ₮1.3 их наяд болгон хөрвүүлж хадгалсан бол үлдсэн 100 сая ам.долларыг валютын хадгаламж болгон байршуулав.

Харин жилийн эцэст:

• 11.6 тэрбум төгрөгийн хүүгийн орлого бүртгэгдсэн ч,
• 14.7 тэрбумын хуримтлагдсан хүү, 2.6 тэрбумын ханшийн зөрүү хүлээн,
• нийт 5.7 тэрбум төгрөгийн алдагдал үүссэн байна.

Аудитын дүгнэлт:

• Тус бонд нь Монгол Улсын өрийн багцын 5.2%-ийг бүрдүүлж буй.
• Өрийн удирдлагын тухай хууль зөрчсөн: Төслийн санхүүжилт зориулагдсан бондын мөнгийг ашиглалгүйгээр банканд хадгалсан нь хуульд нийцээгүй гэж дүгнэжээ.
• Бонд гаргах шийдвэр эрсдэлийн үнэлгээг үл харгалзан гарсан.
• Орон нутгийн түвшинд нийт ₮798.3 тэрбумын дотоод үнэт цаас гаргаснаас 44% нь ашиглагдаагүй, банкны дансанд үлдсэн.

Аудитын зөвлөмж:

• Санхүүгийн сахилга бат, өрийн хяналтыг чангатгах
• Зөвхөн хэрэгжих бэлэн төслүүдэд зээл авч, бонд гаргах
• Хууль зөрчсөн хэлбэрээр өр нэмэхгүй байх бодлого баримтлах шаардлагатай гэж онцолсон.