АНУ-ын зэвсэгт хүчин Ираны цэргийн объектууд, үүнд хэд хэдэн чухал гүүр, эргийн ажиглалтын болон агаарын довтолгооноос хамгаалах байгууламжуудад цохилт өглөө.
Цохилтын гол бай нь Ормузын хоолойн хамгийн нарийн хэсэгт байрлах, Ираны Тэнгисийн цэргийн хүчний төв штаб болон гол бааз байрладаг эргийн Бандар-Аббас хот байх магадлалтай байна. Довтолгоонд өртсөн олон гүүр нь Бандар-Аббас хот руу чиглэсэн тээврийн чухал замуудад байрладаг аж.
Устгагдсан таван гүүрний дунд Кахорестан болон Гариве гүүрнүүд багтжээ. Түүнчлэн эргийн Бандар-Хамир дахь төмөр замын өртөө болон Ираны зүүн өмнөд хэсэгт орших Ираншахр нисэх онгоцны буудал цохилтод өртсөн байна. Ираны төрийн мэдээллийн хэрэгслүүдийн мэдээлснээр, цохилтын улмаас долоон хүн амь үрэгджээ.
Үүний хариуд Ираны зэвсэгт хүчин шөнийн турш Сири, Бахрейн, Кувейт, Йордан болон Катар дахь АНУ-ын объектууд руу үргэлжлүүлэн довтолсон байна.
Трампын сүрдүүлэг биелэв
Эдгээр цохилтууд нь АНУ-ын Ерөнхийлөгч Дональд Трамп хэрэв Тегеран хот энхийн хэлэлцээрт эргэн орохоос татгалзвал тус улсын гүүр, цахилгаан станцууд руу довтолно гэж сүрдүүлсний дараа боллоо.
Трамп энэ долоо хоногийн эхээр хэлэхдээ: “Хэрэв тэд хэлэлцээрийн ширээний ард сууж, яриа хэлэлцээ хийж эхлэхгүй бол бид тэдний бүх цахилгаан станцыг устгах болно. Бид тэдний бүх гүүрийг нураах болно” гэж мэдэгдэж байсан юм.
Эх сурвалж: The Telegraph
