АНУ-ын Хууль зүйн яамнаас бэлгийн хүчирхийлэгч Жефри Эпштейний хэргийг хэрхэн шийдвэрлэснийг шалгаж буй Конгрессын тусгай хорооны сонсголд технологийн тэрбумтан Билл Гэйтс мэдүүлэг өглөө. Бүгд Найрамдах намын хууль тогтоогч, тус хорооны дарга Жэймс Комерын урилгаар ирсэн тэрбумтан Эпштейнтэй холбогдсон түүх болон түүний зүгээс ирж байсан дарамт шахалтын талаар анх удаа ийнхүү албан ёсоор ам нээсэн байна.
Нууц гэрэл зураг ба сүрдүүлгийн тактик
Эпштейн, Гэйтс нар 2008 онд хэд хэдэн удаа уулзаж байсан нь баримтаар тогтоогдсон бөгөөд энэ оны эхээр ил болсон материалууд дундаас Гэйтсийн нүүрийг нь нуусан үл таних эмэгтэйтэй хамт авхуулсан зураг олдсон юм. Билл Гэйтс өмнө нь түүнтэй зөвхөн буяны ажлын шугамаар уулзаж байснаа хүлээн зөвшөөрч, үүнийгээ “амьдралынхаа том алдаа” гэж нэрлэж байв. Мөн тэрээр энэ оны хоёрдугаар сард өөрийн сангийн ажилтнуудтай уулзахдаа гэр бүлээс гадуур хоёр ч эмэгтэйтэй харилцаатай байснаа хүлээж байжээ.
Билл Гэйтс тусгай хороонд өгсөн мэдүүлэгтээ Эпштейнийг анх уулзах үедээ ямар хэрэгт холбогдож байсныг сайн мэдээгүй, хууль бус үйлдлийг нь ч нүдээр хараагүй гэдгээ баталсан байна. Харин Эпштейн түүний энэхүү хувийн амьдралын нууцыг олж мэдээд, өөрийнхөө ашиг сонирхолд нийцүүлэн хамтран ажиллуулахын тулд сүрдүүлгийн зэвсэг болгон ашиглаж эхэлжээ.
“Эпштейнтэй ямар ч холбоогүй миний эдгээр харилцаанууд гэр бүлд минь маш хүндээр туссан. Миний үнэнч бус байдлын талаарх мэдээллийг худал мэдээллээр баяжуулсан Эпштейн намайг өөртэйгөө хамтран ажиллуулахын тулд дарамтлахад ашигласан” хэмээн тэрбумтан Билл Гэйтс өгүүлжээ.
Олон улсыг хамарсан дуулиан ба Трампын нэр
Насанд хүрээгүй хүмүүсийг бэлгийн мөлжлөгт ашигласан хэргээр 2019 онд шоронд байхдаа амиа хорлосон Жефри Эпштейнтэй холбоотой байсан хүмүүсийн жагсаалтад улс төр, бизнес, банк санхүүгийн маш олон нөлөө бүхий эрхмүүд багтдаг. Ил болсон баримтуудад АНУ-ын Ерөнхийлөгч Дональд Трампын нэр ч багтсан бөгөөд тэдний харилцаа 1990-ээд оноос 2000-аад оны үе хүртэл үргэлжилсэн гэж тэмдэглэгджээ.
Уг хэргийн шалгалтын явц болон ил болсон материалуудын эргэн тойрон дахь гол баримтууд:
- Дарамт шахалт: Эпштейн Билл Гэйтсийн үнэнч бус байдлын талаарх мэдээллийг худал зүйлээр баяжуулж, өөрийн зорилгодоо ашиглахаар заналхийлж байсан.
- Трампын харилцаа: Хууль зүйн яамны баримтаар Дональд Трамп, Эпштейн нарын холбоо бараг 10 гаруй жил үргэлжилсэн болох нь батлагдсан.
- Прокурорын шүүмжлэл: Энэ оны дөрөвдүгээр сард албан тушаалаасаа буусан АНУ-ын Ерөнхий прокурор Пэм Бонди уг хэргийг шалгах явцдаа Трамптай холбоотой зарим чухал баримтуудыг санаатайгаар нуун дарагдуулсан гэх шүүмжлэлд өртөөд байна.
