Германы Холбооны тагнуулын алба буюу BND Оросын хакеруудын эсрэг ажиллах зорилгоор геймерүүдийг элсүүлж эхэлжээ. Энэ талаар The Telegraph мэдээлсэн байна.
Хэвлэлийн мэдээлснээр, тагнуулын албаны төлөөлөгчид Кёльн хотод болох дэлхийн хамгийн том видео тоглоомын наадам Gamescom 2026-д очиж, залуу тагнуулчдыг элсүүлэхээр төлөвлөж байна. BND-ийн үзэж буйгаар, геймерүүдийн ур чадвар болон тагнуулын ажилд шаардлагатай чадваруудын хооронд “мэдэгдэхүйц давхцал” байдаг аж.
Gamescom дээр кибер чадварыг шалгана
“Бид геймерүүд болон бидний хайж буй гол авьяас чадварын хооронд томоохон огтлолцол байгааг харж байна: тэд техникийн мэдлэгтэй, өөр өөр дүрд орох дуртай, даалгавар биелүүлж, ялалт хүртэл зорилгынхоо төлөө тууштай явдаг” гэж BND-ийн төлөөлөгч Юлия Линнер сонинд ярьжээ.
Тус байгууллагын стенд дээр зочдод кибер аюулгүй байдлын чадвараа шалгах таван үе шаттай сорилт өгөх юм. Мөн BND нэр дэвшигчдийг татахын тулд BND Legends нэртэй өөрийн видео тоглоомыг бүтээжээ. Уг тоглоомоор нууцлал, сэм ажиллагаа болон хакердах чадварыг шалгах аж.
Шинэчлэл маргаан дагуулж байна
Геймерүүдийг элсүүлэх ажил Германы канцлер Фридрих Мерцийн засгийн газар BND-д Оросынх гэж үзэж буй кибер халдлагад хариу арга хэмжээ авах эрх олгосон шинэчлэлийг баталсны дараа тэргүүлэх чиглэл болсон байна.
Орос, Украины мөргөлдөөн эхэлснээс хойш Герман хэд хэдэн удаагийн кибер халдлагад өртсөн гэж мэдээлэгдсэн. Үүнд 2024 оны 3-р сард Агаарын цэргийн хүчний офицеруудын яриаг хууль бусаар сонссон хэрэг ч багтжээ.
Гэсэн ч “Зүүний нам” болон “Германы төлөөх Альтернатива” зэрэг улс төрийн хүчнүүдийн шүүмжлэгчид уг шинэчлэл бүх нийтийн хяналт, тагналтад хүргэж болзошгүй гэж болгоомжилж байна.
