Их Британийн поп дуучин Бонни Тайлер хүнд өвчний дараа 75 насандаа таалал төгссөн талаар хэвлэлүүд мэдээлжээ. Total Eclipse of the Heart, Holding Out for a Hero, It’s a Heartache зэрэг хит дуугаараа алдартай дуучны нас барсан тухай мэдээллийг 7-р сарын 9-нд түүний менежер баталсан байна.
Дуучны албан ёсны цахим хуудсанд нийтэлсэн мэдэгдэлд, Бонни Тайлер Португалийн нэгэн эмнэлэгт эмчлүүлж байсан өвчнийхөө улмаас өнгөрсөн шөнө гэнэт нас барсан гэж дурджээ. Түүний гэр бүл болон багийнхан энэ мэдээг гүн эмгэнэлтэйгээр хүлээн авч байгаагаа илэрхийлсэн байна.
Тайлер дөрөвдүгээр сарын сүүлээр Португалийн Фару хотод гэдэсний яаралтай мэс засалд орсон бөгөөд дараа нь хиймэл комын байдалд байсан аж. Зургадугаар сарын дундуур түүнийг комоос гаргасан ч биеийн байдал нь хүнд хэвээр байсан гэж мэдээлэгдсэн байна.
18 студийн цомог, олон арван хит дуу үлдээжээ
Бонни Тайлер 1970-аад оны сүүл, 1980-аад онд олон улсын хэмжээнд алдаршсан. Түүний Total Eclipse of the Heart баллад Их Британи болон АНУ-ын чартуудыг тэргүүлж, дуучинд “Грэмми”-гийн номинац авчирсан юм.
Урт хугацааны карьерынхаа турш тэрээр 80 гаруй сингл, 18 студийн цомог гаргасан байна. 2013 онд Бонни Тайлер Их Британийг төлөөлөн “Eurovision” тэмцээнд оролцож, 19-р байр эзэлж байжээ.
Сүүлийн жилүүдэд ч тэрээр тайзнаа гарсаар байсан бөгөөд 2026 оны зун Европ даяар томоохон аялан тоглолт хийхээр төлөвлөж байв. Уг аялан тоглолтын хүрээнд Германд бараг 20 тоглолт хийхээр товлогдоод байсан байна.
