Ус, цаг уур, орчны шинжилгээний газраас 2026 оны долоодугаар сарын 31-ний өдөр гаргасан бэлчээрийн хөнөөлт царцааны ажиглалтын мэдээгээр зарим орон нутагт царцааны аюул идэвхжсэн нь тогтоогджээ. Тодруулбал, Говь-Алтай аймгийн Халиун сум болон Сүхбаатар аймгийн Баяндэлгэр сумын нутаг дэвсгэрт царцааны нягтшил зөвшөөрөгдөх хэмжээнээс эрс хэтэрсэн байна.
Нэг ам метр талбайн нягтшил ба доминант зүйлүүд
Дээрх сумдад хийсэн шалгалтаар нэг ам метр талбайд 8-25 ширхэг царцаа тоологдсон нь хэт олшролтын аюултай түвшинд хүрснийг баталж байгаа юм. Ажиглалт хийсэн бусад сумдын нутагт царцааны нягтшил нэг ам метрт 1-7 ширхэг буюу хэвийн хэмжээнд байсан бөгөөд энэ удаагийн олшролтод Сибирийн царцаахай болон бараан далавчит царцаахай онцгойлон зонхилж байна.
Бэлчээрийн ургацад үзүүлэх сөрөг нөлөө
Бэлчээрийн хөнөөлт царцаа ийнхүү аюултай түвшинд хүртэл олшрох нь ургамлын гарцыг сүйтгэж, улмаар малын тэжээлийн нөөцөд ноцтой сөрөг нөлөө үзүүлэх эрсдэлтэй аж. Иймээс холбогдох мэргэжлийн байгууллагуудаас тухайн бүс нутгуудад ажиглалт, тандалтын ажлыг үргэлжлүүлэн чангаруулан явуулж байна.
