Хятадад роботуудад зориулсан “цэцэрлэг” нээжээ. Тус төвд судлаачид төхөөрөмжүүдийг сургах уламжлалт бус арга ашиглаж байна. Энэ талаар Global Times мэдээлэв.
Сургалтын төвийг Хятадын Tashan Technology компани байгуулжээ. Эрдэмтэд роботуудыг хүнээс шууд заавар авах бус, туршилт болон алдааны аргаар бүхнийг бие даан суралцдаг болгохыг зорьж байна.
“Цэцэрлэг”-ийн сургалтын арга нь роботуудыг ашиглалтад орсныхоо дараа ч үргэлжлүүлэн дасан зохицох боломжтой болгоход чиглэжээ. Үүнд урьдчилан бэлтгээгүй нөхцөл байдалд дасан зохицох чадвар ч багтана.
Жишээлбэл, робот сургалтын үеэр ханатай мөргөлдвөл дахин оролдож, өмнөх алдаагаа давтахгүйн тулд хөдөлгөөний чиглэлээ өөрчилнө. Ингэснээр бүтэлгүйтсэн оролдлого бүр сургалтын шинэ өгөгдөл болж хувирна.
Бээжингийн Нийгмийн шинжлэх ухааны академийн судлаач Ван Пэнгийн хэлснээр хүрээлэн буй орчноо бие даан судлах нь роботуудыг зөвхөн тодорхой даалгаварт зориулсан хязгаарлагдмал сургалтаас гаргаж, физик ертөнцийн талаар илүү суурь ойлголттой болоход тусалж магадгүй байна.
Судлаачид энэхүү сургалтын арга илүү их хугацаа шаардана гэдгийг онцолжээ. Гэсэн ч робот суралцахын тулд алдаа гаргах чадвартай байх ёстой гэж тэд үзэж байна. Урт хугацаанд төхөөрөмжүүд хуримтлуулсан туршлагаа хоорондоо хуваалцах боломжтой болох төлөвтэй байна.
