Мэттью Макконахи HBO-ийн “The Last of Us” цувралд Жоэл Миллерийн дүрийг бүтээх боломжтой байсан ч татгалзжээ. Улмаар уг дүр Педро Паскальд очсон байна. Жүжигчин тухайн үед зураг авалтаас хөндийрч, зохиол бичих болон бусад ажилдаа түлхүү анхаарч байсан гэж тайлбарлажээ.
Макконахи энэ тухай Жошуа Хоровицын Happy Sad Confused подкастад ярьсан байна. Түүний хэлснээр тэр саналыг нухацтай авч үзэж, цувралын зохиолыг өндөр үнэлсэн ч бараг зураг авалтад оролцохоо больсон үедээ уг сценарийг хүлээн авчээ.
“Тэр үед би бараг кинонд тоглохгүй байсан. Тэр үеэр илүү их бичиж байсан санагдана. Сценарий үнэхээр сайн байсан, би их сонирхсон”, — гэж Макконахи ярьжээ.
Жүжигчин ерөнхийдөө олон телевизийн цуврал үздэггүй гэдгээ хэлсэн байна. Үүний зэрэгцээ 2014 онд гарсан “True Detective”-ийн эхний улиралд ажилласан туршлагаа дурджээ. Макконахигийн үзэж байгаагаар тухайн үед алдартай кино жүжигчид телевизийн төслүүд рүү шилжих нь өнөөгийнх шиг түгээмэл байгаагүй аж.
“Би телевиз нэг их үздэггүй. Гэхдээ ‘True Detective’-ээр бид онцгой зүйл хийж чадсан. Тухайн үед над шиг эсвэл Вуди Харрельсон шиг жүжигчид телевизийн төсөлд тоглохоор шилжих нь одоогийнх шиг хэвийн зүйл биш байсан. Тэр төсөл асар их амжилт олсон”, — гэж тэр хэлжээ.
Макконахигийн хэлснээр “The Last of Us”-ын асуудал нь төслийн чанарт бус, харин тухайн үед өөрөө идэвхтэй зураг авалтад эргэн ороход бэлэн байгаагүйд оршиж байжээ.
“‘The Last of Us’ үнэхээр сайн байсан. Зүгээр л тэр үед надад тохирох зүйл биш байлаа”, — гэж жүжигчин тайлбарласан байна.
Тэр үед ямар жүжигчний төсөл өөрийг нь сонирхож чадахыг ч мэдэхгүй байсан гэдгээ нэмжээ.
“Тухайн үед ер нь надад юу тохирох байсан гэдгийг мэдэхгүй байна”, — гэж Макконахи хэлсэн байна.
Ярилцлагын үеэр жүжигчин өөрийн бичвэр дээр ажиллаж байхдаа ойролцоогоор гурван долоо хоногийн турш бусад бүх ажлаа хойш тавьж чаддаг тухайгаа мөн ярьжээ. Ийм үед ирсэн сценарийг зөвхөн чанараар нь бус, тухайн ажилд хангалттай анхаарал хандуулж чадах эсэхээр нь үнэлдэг байна.
“Хэрэв тэр үед миний амьдралд тодорхой зүйлс өрнөж байвал би энэ сценарид зохих хэмжээний анхаарал гаргаж чадахгүй гэдгээ ойлгодог”, — гэж тэр тайлбарлажээ.
Макконахиг Жоэлийн дүрд авч үзэж байсан тухай өмнө нь ч мэдээлэгдэж байв. 2023 онд “The Last of Us”-ын шоураннер Крэйг Мэйзин жүжигчинтэй цувралд оролцох талаар ярилцсан гэдгээ хэлж байсан. Гэхдээ тухайн үед хэлэлцээ төдийлөн урагшлаагүйг онцолжээ.
Мэйзиний хэлснээр Педро Паскаль анхнаасаа Жоэлийн дүрийн гол нэр дэвшигчдийн нэг байсан байна. Гэвч эхэндээ түүний ажлын хуваарийн улмаас оролцох боломжгүй гэсэн мэдээлэл бүтээгчдэд иржээ. Тиймээс тэд өөр хувилбаруудыг авч үзэж эхэлсэн бөгөөд тэдний дунд Макконахи байсан аж.
Удалгүй Паскалийн агент Мэйзинд жүжигчин төсөлд оролцох боломжтой гэж мэдэгдсэн байна.
Мэйзин Паскалийг Англид киноны зураг авалтад оролцож байх үед нь сценарийг илгээжээ. Жүжигчний ажлын ачаалал болон цагийн зөрүүгээс шалтгаалан хурдан хариу ирнэ гэж тэр хүлээгээгүй байна.
“Ер нь жүжигчинд сценарий явуулахад нэг сарын дотор уншвал азтайд тооцогдоно. Тиймээс киноны зураг авалт, цагийн зөрүү зэргийг бодоод энэ бүхэн нэлээд удах байх гэж би бодсон”, — хэмээн Мэйзин дурсжээ.
Гэвч Паскаль сценарийг бараг тэр даруй уншсан байна. Мэйзиний хэлснээр тэр материалыг баасан гарагт илгээсэн бөгөөд маргааш өглөө нь жүжигчин төсөлд дуртай болсноо хэлж, бүтээгчидтэй ярилцах хүсэлтэй байгаагаа мэдэгдсэн дуудлага иржээ.
Мэйзин Макконахи ч Жоэлийн дүрийг сайн бүтээж чадах байсан гэж үздэг ч цуврал өөр өнгө аястай болох байсныг онцолжээ.
“Бүх зүйл өөрөөр өрнөсөн альтернатив ертөнц хаа нэгтээ байдаг гэдэгт би итгэлтэй байна. Мэттью Макконахи бол гайхалтай жүжигчин. Тэр хувилбар ч маш сайн байх байсан гэдэгт итгэлтэй байна. Гэхдээ бүх зүйл өөр болох байлаа. Харин бидний бүтээсэн зүйл надад таалагддаг. Эцэст нь бүх зүйл зөв болсон гэж бодож байна”, — гэж тэр хэлжээ.
Ингээд Жоэл Миллерийн дүрийг Педро Паскаль бүтээсэн юм. 2013 оны ижил нэртэй видео тоглоомоос сэдэвлэсэн “The Last of Us” цуврал HBO сувгаар 2023 онд нээлтээ хийсэн. Үйл явдал постапокалиптик ертөнцөд өрнөх бөгөөд Жоэл халдварт өвчинд нэрвэгдсэн АНУ-ын нутгаар Элли хэмээх охиныг аюулгүй хүргэх даалгавар авдаг.
Цуврал Emmy шагналд 40 удаа нэр дэвшиж, есөн шагнал хүртсэн байна. Педро Паскаль Жоэлийн дүрээрээ Emmy-д хоёр удаа нэр дэвшжээ. “The Last of Us”-ын гуравдугаар улирлын нээлтийг 2027 онд хийхээр төлөвлөж байна.
Эх сурвалж: People.
