Neuralink компанийн топ менежер Шивон Зилис Америкийн тэрбумтан, дэлхийн хамгийн баян хүн Илон Маскаас салах болсноо мэдэгдлээ. Тэд дундаасаа дөрвөн хүүхэдтэй юм.
Талуудын гэнэтийн салалтын талаар тэрээр X сошиал сүлжээгээрээ дамжуулан хуваалцжээ. Зилисийн хэлснээр, салснаас хэдхэн хоногийн өмнө тэдний хооронд романтик харилцаа хадгалагдсаар байсан тул Маскийн шийдвэр түүний хувьд огцом гэнэтийн зүйл болсон байна.
“Ердөө ганцхан долоо хоногийн дотор, ямар ч сануулгагүйгээр хайр сэтгэлээс салалт руу шилжих нь хэцүү байдаг ч заримдаа ийм зүйл тохиолддог” хэмээн тэрээр бичжээ.
Үгээ батлахын тулд Зилис есдүгээр сарын 24-ний өдрийн Масктай харилцсан зурвасынхаа скриншотыг нийтэлсэн байна. Уг зурвасоос үзвэл хамтдаа өглөөний хоол цохисны дараа тэрээр тэрбумтанд хайртайгаа илчилж, Маск ч мөн адил хариулсан байв. Түүнчлэн Маск Зилисийг өөрийн “хоёр дахь хагас” (soulmate) гэж нэрлээд, БНХАУ-ын Дарга Си Жинпинтэй хийх оройн зоогт хамт авч явах боломжийн талаар дурджээ.
Зилис бизнесмен залууг “амьдралаасаа илүү” хайрладаг байснаа хүлээн зөвшөөрч, салалтыг хүндээр тусган авч байгаагаа ярьсан байна. Үүний зэрэгцээ тэрээр дөрвөн хүүхэдтэй болсондоо талархаж байгаагаа онцолж, салсны дараа тэд Масктай найзууд хэвээр үлдэж, хүүхдүүдээ хамтран хүмүүжүүлнэ гэж найдаж байгаагаа илэрхийлжээ.
Шивон Зилис нь Маскийн үүсгэн байгуулсан “Neuralink” нейротехнологийн компанияд үйл ажиллагаа болон тусгай төслүүд хариуцсан захирлын албан тушаал хашдаг. Тэрээр өмнө нь OpenAI-ийн Төлөөлөн Удирдах Зөвлөлийн бүрэлдэхүүнд ажиллаж байсан бөгөөд хиймэл оюун ухаан болон венчур хөрөнгө оруулалтын салбарт ажиллаж байсан туршлагатай.
Зилис болон Маск нар дундаасаа дөрвөн хүүхэдтэй. 2021 онд тэд Страйдер, Азур хэмээх ихэр хүүхдүүдтэй болсон бөгөөд дараа нь охин Аркадия, харин 2025 онд Зилис Селдон Ликург хэмээх хүү төрүүлснээ мэдээлж байв. Урт хугацааны турш хосууд олон нийтэд харилцааныхаа талаар бараг ярьдаггүй байсан юм.
Маск өөрөө энэхүү мэдээлэл нийтлэгдэх хүртэл Зилисийн салалтын талаарх мэдэгдэлд олон нийтийн өмнө тайлбар хийгээгүй байна.
Илон Маск өмнө нь хоёр удаа гэрлэж байсан: зохиолч Жастин Уилсонтой 2000-2008 онд гэр бүл байхдаа тэд зургаан хүүхэдтэй болсон ч нэг нь нялхдаа нас баржээ. Дараа нь бизнесмен Британийн жүжигчин Талула Райлитай хоёр удаа (2010-2012 болон 2013-2016 онуудад) гэрлэсэн юм. Үүний дараа Маск жүжигчин Эмбер Хёрдтой харилцаатай байсан бөгөөд 2018 оноос дуучин Граймстай болзож, тэд дундаасаа гурван хүүхэдтэй болсон билээ. Тэд хэд хэдэн удаа салж, дараа нь хүүхдээ асран хамгаалах эрхийн төлөө маргалдаж байв. Үүнээс гадна 2024 онд Маск зохиолч Эшли Сент-Клэрээс нэг хүүтэй болсон юм.
