Японд хүн амын насжилт улам эрчимжиж, 100 болон түүнээс дээш настай иргэдийн тоо 100 мянгын босгыг давсан талаар BBC мэдээлжээ. Японы Эрүүл мэндийн яамны статистикаар энэ насны ангилалд нийт 107,677 хүн бүртгэгдсэн байна.
100 нас хүрсэн болон түүнээс өндөр настай япончуудын 88 орчим хувийг эмэгтэйчүүд эзэлж байгаа аж. Тус улсын хамгийн өндөр настай эмэгтэйгээр Киото хотод амьдардаг 114 настай Кишимото Фүёо бүртгэгдсэн бол эрэгтэйчүүдээс Кумамото мужийн 112 настай Като Хикару хамгийн өндөр настайд тооцогдож байна.
Эх сурвалжийн мэдээлснээр Япон улс зуун настнуудын тоогоор дэлхийд хамгийн өндөр үзүүлэлттэй орны нэг хэвээр байна. Дундаж наслалт уртасахын зэрэгцээ төрөлт буурч байгаа нь тус улсын хүн амын бүтцэд томоохон өөрчлөлт авчирчээ.
Хэрэглээний зах зээлд ч насжилтын өөрчлөлт мэдрэгдэв
Өндөр настнуудын эзлэх хувь өссөн нь зөвхөн хүн ам зүйн статистикт бус, өдөр тутмын хэрэглээний зах зээлд ч илэрч байна. Насанд хүрэгчдэд зориулсан живхний борлуулалт хүүхдийн живхнийхээс давсан үзүүлэлт Японд арав гаруй жилийн өмнөөс ажиглагдаж эхэлжээ.
Энэ өөрчлөлт нь тус улсын хөгшрөлтийн түвшин ямар хэмжээнд хүрснийг харуулах сонирхолтой жишээ болж байна. Ахмад настны асаргаа, эрүүл мэндийн үйлчилгээ болон тэдэнд зориулсан бүтээгдэхүүний эрэлт цаашид ч Японы эдийн засаг, нийгмийн бодлогод чухал байр суурь эзлэх төлөвтэй байна.
Эх сурвалж: BBC
