БНХАУ-д нэгэн эмэгтэй кобра могойд хазуулсан нөхрийнхөө амийг аврахын тулд шархнаас нь хорыг амаараа сорж гаргахыг оролдоод өөрөө давхар хордсон хачирхалтай бөгөөд сургамжтай үйл явдал болжээ. Эмч нарын зүгээс кино, драм дээр гардаг энэхүү түгээмэл “тактик” нь бодит амьдрал дээр ямар ч тус нэмэргүй төдийгүй тусламж үзүүлж буй хүнийг шууд үхлийн аюулд хүргэж болохыг онцгойлон анхааруулж байна.
Телевизийн цуврал ба бодит амьдралын зөрүү
“South China Morning Post” (SCMP) хэвлэлийн мэдээлснээр уг хэрэг Юньнань мужийн Юаньян бүс нутагт гарчээ. Нэгэн өндөр настан фермер талбайдаа ажиллаж байхдаа кобра могойд гарынхаа хурууг хазуулсан байна. Төд удалгүй хазуулсан газар нь хөөж хавдан, толгой нь эргэж, бие нь сульдсан тул дэргэд нь байсан эхнэр нь сандарсандаа зурагтаар үзсэн зүйлээ дуурайн, ямар ч хамгаалалтын хэрэгсэлгүйгээр шархны хорыг шууд амаараа сорж эхэлжээ.
Үүний дараа нөхрийг нь яаралтай эмнэлэгт хүргэсэн ч хэдхэн цагийн дараа эхнэрийнх нь биед мөн л хачирхалтай шинж тэмдгүүд илэрч эхэлсэн байна. Түүний ам, хэл, нүүр болон гар хөл нь мэдээгүйжиж, маргааш нь бие нь бүхэлдээ сульдсан тул ар гэрийнхэн нь түүнийг ч мөн эмнэлэгт хүргэжээ.
Эмч нар хосуудад кобрагийн хорны эсрэг ийлдэс тарьж, шаардлагатай эмчилгээг хийснээр хэд хоногийн дараа биеийн байдал нь тогтворжиж, тэд хамтдаа гэр рүүгээ харьцгаасан байна. Тэдний хайр дурлал, тууштай байдал гайхалтай ч ашигласан арга нь дэндүү аюултай байв.
Эмч нарын анхааруулга: Могойд хазуулах үед ЦЭЭРЛЭХ зүйлс
Уг үйл явдлын дараа эмч нар ард иргэдийн дунд байдаг ам дамжсан буруу, аюултай “ардын” аргуудыг эрс няцааж, дараах санамжийг гаргажээ:
- Амаараа хор сорох: Хүний амны хөндийн салст бүрхэвч нь маш олон тооны хялгасан судастай байдаг тул хор цусанд маш хурдан нэвтэрдэг. Мөн могойн хор хазсан даруйд арьсан доорх эд эс болон цусны урсгал руу аль хэдийн орсон байдаг тул түүнийг сорж гаргах нь техникийн хувьд ямар ч боломжгүй.
- Шархыг зүсэх: Цустай цуг хорыг гаргах гэж хазуулсан хэсгийг зүсэх нь их хэмжээний цус алдалт үүсгэх буюу шархыг бохирдуулж, халдвар оруулах өндөр эрсдэлтэй.
- Гал болон мөс хэрэглэх: Шархыг галаар төөнөх, түлж ариутгах эсвэл дээр нь мөс тавих зэрэг “ардын” аргууд нь арьсны эд эсийг улам гэмтээдэг тул тус болохоосоо ус болно.
Зөв алхам: Могойд хазуулсан тохиолдолд хамгийн зөв алхам бол түргэн тусламж яаралтай дуудаж, эмчийг иртэл өвчтөний хөдөлгөөнийг дээд зэргээр хязгаарлан, тайван байлгах явдал юм. Мөн эмч нарт хорны эсрэг зөв ийлдэс сонгоход туслах үүднээс могойн зургийг алсаас аюулгүйгээр авах эсвэл гадаад төрхийг нь сайн тогтоож авахыг зөвлөдөг байна. Кино бол зүгээр л уран сайхны найруулга тул эрүүл мэндээ драмтай андуурахгүй байхыг мэргэжилтнүүд сануулж байна.
