Кристофер Ноланы найруулсан, хүлээлт өндөртэй байсан “The Odyssey” уран сайхны кино Лондон хотноо дэлхийн нээлтээ хийлээ. Нээлтийн дараа кино шүүмжлэгчдээс маш өндөр үнэлгээ авсан тус бүтээл ирэх оны “Оскар”-ын наадмын гол өрсөлдөгчдийн нэгээр хэдийнэ яригдаж эхэллээ.
Грекийн эртний яруу найрагч Хомерын алдарт туульсаас сэдэвлэсэн, гурван цаг үргэлжлэх тус бүтээлийг кино шүүмжлэгчид дайны дараах хоосрол, итгэл найдвараа алдсан хүний сэтгэл зүйг үхэгсдийн ертөнцөөр дамжуулан өгүүлсэн асар том цар хүрээтэй, домогт бүтээл болсон гэж тодорхойлж байна.
Оскарын таамаг ба жүжигчдийн тоглолт
“IndieWire”-ийн ахлах редактор Энн Томпсон тус киног Оскарын шилдэг кино төрөлд нэр дэвших төдийгүй ялах бүрэн боломжтой бүтээл гэж үнэлжээ.
- Мэтт Дэймон: Киноны гол дүрийг бүтээсэн түүнийг шилдэг эрэгтэй гол дүрийн шагналын хүчтэй өрсөлдөгч болно гэж шүүмжлэгчид үзэж байна.
- Роберт Паттинсон: Эсрэг талын дүр болох Антинуусын дүрийг бүтээсэн түүний жүжиглэлт хамгийн их анхаарал татаж, өндөр үнэлгээ аваад байна.
Ноланы шинэ хэв маяг ба аймшгийн элементүүд
Кино шүүмжлэгч Дэвис киноны бүтээмж, тайз засалт, орчны дизайн болон тулаант хэсгүүдийн цар хүрээг онцгойлон магтжээ. Түүний хэлснээр зураг авалтын орчин үнэхээр бодит мэт санагдахаас гадна найруулагч Кристофер Нолан өөрийн хэв маягт шинэ өнгө нэмж, кинондоо аймшгийн элементүүдийг шингээж өгсөн нь үзэгчдэд гайхалтай түгшүүртэй мэдрэмжийг төрүүлж чадсан байна.
