Монгол Улсын Зэвсэгт хүчний цэргийн баг Бүгд Найрамдах Хаити Улсад явагдаж буй “Гэмт бүлэглэлтэй тэмцэх хүчин” ажиллагаанд томилгоот үүргээ гүйцэтгэж эхэлсэн байна. Тэд ажиллагааны өмнөх бататгах сургалт, шалгалтад хамрагдсаны дараа цэргийн хүчний командлагчийн тушаалаар “Вертиерес” баазын аюулгүй байдлыг хангах үүргийг хүлээн авчээ.
Монголын цэргийн баг уг үүргийг Чад Улсын цэргийн багаас шилжүүлэн авсан байна. Ийнхүү олон улсын ажиллагааны хүрээнд баазын аюулгүй байдлыг хангах үндсэн чиглэлээр ажиллаж эхэлсэн нь Монгол Улсын энхийг дэмжих ажиллагаанд оролцож ирсэн туршлагын үргэлжлэл болж байна.
Ажиллагааны өмнөх бататгах сургалтаар дараах чиглэлээр нэгдсэн ойлголт, мэдээлэл авчээ:
- ажиллагааны мандат;
- цэргийн хүчний бүтэц, зохион байгуулалт;
- тухайн үеийн цагийн байдал;
- НҮБ-ын хүч хэрэглэх дүрэм;
- хүний эрхийг хангах, энгийн иргэдийг зэвсэгт халдлагаас хамгаалах арга ажиллагаа.
Мөн бусад улсын цэргийн багуудтай хамтран ажиллах, үүрэг гүйцэтгэлийн уялдаа холбоог хангах чиглэлээр төлөвлөлт хийсэн байна. Ингэснээр “Вертиерес” баазын аюулгүй байдлыг хангах үүргээ хэрэгжүүлэх бэлтгэлээ бүрэн хангасан гэж мэдээлжээ.
Хаити Улсад хэрэгжиж буй “Гэмт бүлэглэлтэй тэмцэх хүчин” ажиллагаанд оролцож буй Монголын цэргийн баг цаашид олон улсын хамтарсан ажиллагааны зохион байгуулалт, дүрэм журмын хүрээнд үүргээ үргэлжлүүлэн гүйцэтгэх юм.
2 comments
Монгол цэргүүдийн сахилга бат гэж үнэхээр дэлхийд гайхагддаг шүү
Аюулгүй байдлаа сайн хангаад, үүргээ нэр төртэй биелүүлээрэй