Дорнод аймгийн Халхгол сумын нутаг дахь Нөмрөгийн дархан цаазат газарт гарсан түймрийн хохирлыг үнэлэх ажилд Онцгой байдлын ерөнхий газрын хоёр нисдэг тэрэг ашиглахаар болжээ.
Байгаль орчин, уур амьсгалын өөрчлөлтийн сайдын 2026 оны аравдугаар сарын 26-ны хуралдаанаас өгсөн үүрэг, чиглэлийн дагуу түймрийн хохирлыг тогтоох шинжээчдийн багийн ажиллагааг дэмжих тусгай ажлын хэсгийг шуурхай байгуулсан байна.
Ажлын хэсгийг тус яамны Төрийн нарийн бичгийн дарга Ш.Батбаяр ахалж байгаа бөгөөд газар дээр ажиллах шинжээчдэд шаардлагатай техник, тоног төхөөрөмж, хүнс, байрлах нөхцөл болон бусад багаж хэрэгслийг бэлтгэх ажлыг зохион байгуулжээ.
Газраар хүрэх боломжгүй цэгүүдэд нисдэг тэргээр очно
Нөмрөгийн дархан цаазат газрын зарим хэсэгт байгаль, цаг агаарын нөхцөлөөс шалтгаалан автомашинаар болон газраар хүрэх боломжгүй байгаа аж.
Тиймээс шинжээчдийн багийг шаардлагатай байршилд хүргэхдээ Онцгой байдлын ерөнхий газрын хоёр нисдэг тэргийг ашиглахаар шийдвэрлэжээ. Нисдэг тэрэг буух боломжтой цэгүүдийг урьдчилан тогтоож, координатыг нь нарийвчлан тодорхой болгосон байна.
Түймрийн учруулсан хохирлын үнэлгээг нийт есөн цэгт хийхээр төлөвлөжээ. Эдгээрээс гурван байршилд шинжээчдийн баг нисдэг тэргээр очиж ажиллах юм.
Бусад цэгт нөхцөл байдлаас шалтгаалан боломжит тээврийн хэрэгсэл, техник ашиглан хүрэхээр зохион байгуулж байна.
Шинжээчдийн багийг холбоо, эрчим хүчний хэрэгслээр хангана
Алслагдсан бүсэд ажиллах багийг зөвхөн тээврийн хэрэгслээр хангахаас гадна холбоо, эрчим хүчний тасралтгүй ажиллагааг хангах бэлтгэл хийж байгаа аж.
Тухайлбал, шинжээчдийн багт интернэтэд холбогдох төхөөрөмж, цахилгаан гаргах боломжтой зөөврийн эрчим хүчний үүсгүүр болон хээрийн нөхцөлд ажиллахад шаардлагатай бусад тоног төхөөрөмжийг нийлүүлэхээр болжээ.
Ингэснээр Нөмрөгийн дархан цаазат газарт гарсан түймэр байгаль орчин, ургамал, ой болон экосистемд ямар хэмжээний хохирол учруулсныг газар дээр нь тогтоох ажлыг есөн цэгт зохион байгуулах нөхцөл бүрдэх юм.
