Nike компани спортын технологийн Hyperice брэндтэй хамтран биеийн ачааллын дараах сэргэлтэд зориулсан Hyperslide нэртэй шинэ шаахай танилцууллаа. Forbes-ийн мэдээлснээр, уг загвар нь халаалт болон чичиргээний функцтэй бөгөөд 9-р сарын 29-нөөс 249 ам.долларын үнээр худалдаанд гарна.
Hyperslide нь Hyperboot-ийн дараах хоёр дахь хамтарсан бүтээгдэхүүн
Hyperslide нь Nike болон Hyperice-ийн хоёр дахь хамтарсан бүтээгдэхүүн болж байна. Үүнээс өмнө Hyperboot загварыг 2024 онд Парисын Олимпын өмнө танилцуулж, 2025 онд худалдаанд гаргасан юм.
Hyperboot нь шахалт болон халаалтын функцтэй өндөр түрийтэй гутал хэлбэртэй байсан бол шинэ Hyperslide нь энгийн шаахай шиг харагддаг. Гэхдээ хөлийн дээд хэсгийг бүрхэх оосорт халаалт, чичиргээ үүсгэдэг тусгай модуль суурилуулжээ. Харин уланд нь Nike Air Zoom амортизацийн технологи ашигласан байна.
Hyperice-ийн гүйцэтгэх захирал Жим Гьютерийн хэлснээр, компани сэргэлтийн технологийг ашиглахад илүү хялбар болгохыг зорьжээ.
“Бид Hyperslide-ийг бүтээсэн, учир нь сэргэлт нь тамирчдыг тав тух ба үр дүнгийн хооронд сонголт хийхэд хүргэх ёсгүй” гэж тэр хэлсэн байна.
Түүний тайлбарласнаар, тусдаа сэргэлтийн төхөөрөмж хэрэглэхийн оронд шаардлагатай технологийг хүмүүсийн өдөр бүр өмсдөг гуталд нэгтгэхийг зорьжээ.
“Гол санаа нь тамирчдын аль хэдийн байгаа орчинд нь хамт байх явдал. Харин ашиг тус хүртэхийн тулд тэднийг зуршлаа өөрчлөхөд хүргэх биш” гэж Гьютер онцолжээ.
Шаахайг зөвхөн тамирчдад бус өргөн хэрэглээнд зориулжээ
Hyperslide-ийн үнэ 249 ам.доллар байх юм. Жим Гьютерийн хэлснээр, модуль нь өмнөхөөсөө жижиг болсон ч дасгалын дараа хамгийн их ядаргаа хуримтлагддаг хөлийн хэсэгт чиглэсэн үр нөлөө үзүүлэхээр бүтээгджээ.
“Жижиг форматтай гэж боломжийг нь дутуу үнэлж болохгүй. Дасгал эсвэл тэмцээний дараа хөлд асар их ядаргаа хуримтлагддаг бөгөөд Hyperslide яг хамгийн хэрэгтэй хэсэгт чиглэсэн халаалт, чичиргээг өгдөг” гэж тэр хэлсэн байна.
Hyperice-ийн мэдээлснээр, шаахай хэлбэртэй тул шинэ бүтээгдэхүүнийг зөвхөн бэлтгэлийн дараа бус, аяллын үеэр эсвэл урт өдрийн дараа гэртээ өмсөх боломжтой. Гьютер мөн Hyperslide нь зөвхөн мэргэжлийн тамирчдад зориулагдаагүй гэдгийг онцолжээ.
Загварыг боловсруулах явцад Nike болон Hyperice Нидерландын хөлбөмбөгчин Виржил ван Дейк, Америкийн хөнгөн атлетикч Тара Вудголл нартай хамтран ажилласан байна. Мөн Hyperboot-ийг бүтээх явцад хуримтлуулсан туршлагаа ашиглаж, аккумуляторын байрлал, технологийг жижиг хэмжээтэй гуталд нэгтгэх арга, материалын эдэлгээг сайжруулах зэрэг шийдлийг шинэ загварт тусгажээ.
