Монголын рок хөгжмийн түүхэнд өөрийн гэсэн байр суурьтай “Хурд” хамтлаг үүсгэн байгуулагдсаны 35 жилийн ойгоо тохиолдуулан тайзны шинэ бүтээл үзэгчдэд хүргэхээр ажиллаж байна. Тэдний санаачилсан “Норсон зүрх” бүтээл нь бүрэн хэмжээний мюзикл хэлбэрээр тавигдах бөгөөд Монголын тайзны урлагт шинэ цар хүрээ бий болгох зорилготой аж.
Төслийн баг уг бүтээлийг олон улсын мюзиклийн бүтэц, тайзны шийдэл, хөгжмийн найруулгын шаардлагад нийцүүлэхээр төлөвлөжээ. Ингэснээр дотоодын үзэгчдэд зориулсан нэг удаагийн тоглолтоор хязгаарлахгүй, цаашид гадаадын тайзнаа тоглох боломжтой бүтээл болгон хөгжүүлэхээр зорьж байна.
Монгол бүтээлийг олон улсын тайз руу гаргах зорилготой
“Норсон зүрх” мюзиклийг эхний ээлжид Монголд тоглох бөгөөд дараагийн шатанд Англи, Баруун Европ болон Зүүн Өмнөд Азийн орнуудад хүргэх урт хугацааны төлөвлөгөөтэй байна. Төслийн хувьд зөвхөн “Хурд” хамтлагийн ойд зориулсан уран бүтээл биш, Монголын хөгжмийн театрыг олон улсын зах зээлд танилцуулах нэгэн оролдлого болохоороо онцлогтой.
Бүрэн хэмжээний мюзикл бүтээхэд жүжиг, хөгжим, найруулга, тайзны хөдөлгөөн, дүрслэл зэрэг олон салбарын уран бүтээлчид нэгэн баг болж ажилладаг. Тиймээс төслийн бүрэлдэхүүнд театр, кино, хөгжмийн салбарын туршлагатай уран бүтээлчдийг нэгтгэжээ.
“Норсон зүрх”-ийн ард ажиллах баг
Төслийн санаачлагчаар Төрийн соёрхолт “Хурд” хамтлаг ажиллаж байгаа бол ерөнхий продюсероор тус хамтлагийн гитарчин, Гавьяат жүжигчин Д.Отгонбаяр ажиллана. Мөн төслийн продюсер, найруулагч, хөгжмийн болон зохиолын багийг дараах уран бүтээлчид бүрдүүлжээ.
- Продюсер — Ж.Өнөрмаа, ИБУИНХУ дахь Монгол Улсын Соёлын элч
- Төслийн менежер, гүйцэтгэх продюсер — О.Мөнхтуул
- Ерөнхий найруулагч — Б.Даваасүрэн, “Про” театр
- Уран сайхны удирдаач — Б.Анхбаатар, “Про” театр
- Хөгжмийн найруулагч — Б.Чинбат, Урлагийн гавьяат зүтгэлтэн, хөгжмийн зохиолч
- Зохиолч — Х.Чойдогжамц
- Зөвлөх — Н.Наранбаатар, Төрийн шагналт, Урлагийн гавьяат зүтгэлтэн, найруулагч
Ийнхүү “Норсон зүрх” нь “Хурд” хамтлагийн уран бүтээлийн түүхийг шинэ хэлбэрээр үргэлжлүүлэхээс гадна Монголын мюзиклийн бүтээлийг гадаадын үзэгчдэд хүргэх зорилгыг давхар агуулж байна. Төслийн нээлтийн огноо болон жүжигчдийн бүрэлдэхүүнийг дараагийн шатанд танилцуулах төлөвтэй байна.
