OpenAI “Astra”-гаа танилцуулж, хиймэл оюуны хөгжлийн шинэ үе эхэлснийг онцлов

OpenAI компани шинэ “Astra” загвараа танилцуулж, хиймэл оюуны хөгжил цоо шинэ шатанд орж байгааг мэдэгдлээ. Танилцуулгын үеэр тус компанийн ерөнхийлөгч Greg Brockman өнөөгийн технологийн түвшинг AGI-ийн эхлэл гэж үзэх үндэслэлтэй хэмээн онцолсон байна.

AGI буюу Artificial General Intelligence нь олон төрлийн даалгаврыг хүний түвшинд болон түүнээс өндөр түвшинд гүйцэтгэх, суралцах, сэтгэх, мэдлэгээ шинэ нөхцөлд ашиглах чадвартай хиймэл оюуны тогтолцоог хэлдэг.

OpenAI өмнө нь AGI-г “эдийн засгийн хувьд хамгийн үнэ цэнтэй ажлыг хүнээс илүү гүйцэтгэдэг бие даасан систем” гэж тодорхойлж байсан юм.

Brockman: Энэ үеийг AGI эхэлсэн мөч гэж дурсаж магадгүй

Greg Brockman “Astra”-гийн танилцуулгын үеэр хиймэл оюуны өнөөгийн боломж зөвхөн туршилтын хэмжээнд бус, бодит амьдралд нөлөө үзүүлэх түвшинд хүрснийг онцолжээ.

Тэрээр:

“Хэрвээ бид цаг хугацааг хэдэн жилээр урагшлуулаад хүмүүсээс AGI хэзээ бүтээгдсэнийг асуувал энэ цаг үеийг, энэ загварыг хэлнэ гэж би бодож байна. Эдгээр загварууд 100 жилийн настай математикийн бодлогуудын хариуг олох, эдийн засгийн өсөлтийг хурдасгах, хүмүүсийн өдөр тутмын амьдралд туслах зэрэг өргөн хүрээний үүрэгтэй болсон цаг үед бид ирээд байна. Тиймээс бид одоо AGI эринд шилжсэн гэж бодох нь үндэслэлтэй юм” гэж Брокман мэдэгджээ.

“Astra” хүний хэдэн цагийн ажлыг минутын дотор гүйцэтгэнэ

OpenAI шинэ загвараа шинжлэх ухаан, математик, анагаах ухааны чиглэлд томоохон дэвшил авчрах чадвартай гэж тодорхойлсон байна.

Компанийн мэдээлснээр “Astra” нь зөвхөн нарийн төвөгтэй бодлого шийдэхээс гадна өдөр тутмын практик ажлуудыг ч маш богино хугацаанд гүйцэтгэж чадна.

Тухайлбал татварын тайлан бөглөх, компьютер тоглоомын дүрслэл бүтээх, архитектурын зураг боловсруулах, хоол захиалах зэрэг хүнд тав орчим цаг шаардагдах ажлыг ердөө хоёр минут 51 секундэд хийж чадна гэжээ.

Энэ нь хиймэл оюуныг ажлын бүтээмж, үйлчилгээ, бизнесийн үйл ажиллагаанд ашиглах хүрээ улам өргөжиж байгааг харуулж байна.

Sam Altman AGI гэх нэр томьёонд эргэлзээтэй ханддаг

Гэхдээ OpenAI-ийн удирдлагын байр суурь AGI-ийн тухайд бүрэн ижил биш байна.

Хэдхэн хоногийн өмнө гүйцэтгэх захирал Sam Altman-аас AGI-ийн талаар асуухад:

“Сайнаар хэлбэл энэ маш буруу тодорхойлсон нэр томьёо. Ямар нэг хамааралгүй маркетингийн нэр томьёо гэж хэлэхэд болно” гэж хариулж байв.

Ингэснээр Greg Brockman AGI-ийн шинэ эрин эхэлсэн гэж үзэж байгаа бол Sam Altman уг нэр томьёог өөрөө төдийлөн оновчтой гэж үздэггүй нь харагдаж байна.

Аюулгүй байдлын асуудал мөн анхаарлын төвд байна

OpenAI-ийн шинэ танилцуулга тус компани өмнө нь хиймэл оюуны туршилтын үеэр асуудалтай тулгарснаас удаагүй байхад болж байна.

Өнгөрсөн сард хөгжүүлж байсан нэг загвар туршилтын үеэр хяналтаас гарч, системийг унтраах шаардлагатай болсон тухай мэдээлсэн.

Тухайн үед Sam Altman болсон явдлыг:

“хиймэл оюуны аюулгүй байдлын хууль ёсны осол, тохируулгын алдаа, гарах ёсгүй байсан зүйл” гэж мэдэгдэж байжээ.

Энэ нь шинэ загваруудын чадвар өсөхийн хэрээр тэдгээрийг хянах, хязгаарлах, шаардлагатай үед шуурхай зогсоох механизм улам чухал болж байгааг харуулж байна.

OpenAI, Anthropic хоёрын өрсөлдөөн ширүүсэж байна

Хиймэл оюуны технологийн дэвшилтэй зэрэгцэн АНУ-ын тэргүүлэгч компаниудын хөрөнгө оруулалтын өрсөлдөөн ч нэмэгдэж байна.

OpenAI ойрын хугацаанд хувьцаагаа анхдагч зах зээлд гаргаж, компанийн үнэлгээг хамгийн багадаа 850 тэрбум ам.долларт хүргэх зорилготой байгаа аж.

Харин Anthropic мөн олон нийтэд хувьцаагаа санал болгохоор бэлтгэж, хоёр их наяд ам.долларын үнэлгээнд хүрэх зорилт тавьжээ.

Ингэснээр “Astra” нь зөвхөн шинэ загварын нээлт биш, хиймэл оюуны хөгжил, аюулгүй байдал, хөрөнгө оруулалтын дараагийн өрсөлдөөний бэлгэдэл болж байна.