Sherlock цувралын доктор Ватсоны дүрээр олонд танигдсан Британийн жүжигчин Мартин Фримен 55 насандаа хоёр дахь удаагаа гэрлэжээ. Түүний сонгосон хүн нь өөрөөс нь 21 насаар дүү Францын жүжигчин Рейчел Бенаисса юм.
Хос зургаан жилийн турш хамт байгаа ч гэрлэсэн тухайгаа олон нийтэд зарлаагүй байжээ. Харин Лондоны кино наадамд хамт оролцох үеэр нь хоёулангийнх нь ядам хуруунд хуримын бөгж байсныг анзаарснаар нууц нь ил болсон байна.
The Sun-ийн мэдээлснээр, Фримен, Бенаисса нар 2026 оны эхээр гэрлэлтээ албан ёсоор бүртгүүлсэн ч тухайн үед энэ тухай зарлахгүй байхаар шийджээ. Олон нийтийн арга хэмжээнд тэд даруухан хувцасласан байсан ч бөгж нь хувийн амьдралд нь гарсан өөрчлөлтийг олны анхааралд оруулсан байна.
Рейчел Бенаисса жүжигчин, зохиолч, продюсероор ажилладаг. Тэрээр Normal People, This Way Up болон Netflix-ийн Irish Wish инээдмийн кино зэрэг бүтээлд тоглож байжээ. Мартин Фриментэй үерхэж эхэлсэн нь 2020 он.
55 настай жүжигчний хувьд энэ нь хоёр дахь гэрлэлт юм. Бенаиссатай танилцахаасаа өмнө тэр Британийн жүжигчин Аманда Аббингтонтой 16 гаруй жил хамт амьдарсан байна. Үзэгчид тэднийг Sherlock цувралаар ч сайн мэднэ. Тус бүтээлд Фримен Жон Ватсон, Аббингтон Мэри Ватсоны дүрийг бүтээж, Бенедикт Камбербэтч Шерлок Холмсын гол дүрд тоглосон юм.
Фримен, Аббингтон нар 2016 онд салжээ. Аббингтон салалтын шалтгаануудын нэгээр өөр өөр төслүүд дээр ажилладаг байсан тул удаан хугацаагаар тусдаа байх шаардлагатай болдог байсныг нэрлэж байсан байна.
Хуучин хос 18 настай Грейс хэмээх охин, 20 настай Жо хэмээх хүүтэй.
Романтик харилцаа нь дууссан ч Фримен, Аббингтон нар найрсаг харилцаагаа хадгалж үлджээ. Харин одоо жүжигчин Рейчел Бенаиссатай амьдралынхаа шинэ үеийг эхлүүлээд байна.
