CS2-ийн IEM Cologne Major 2026 тэмцээнд The MongolZ баг B8-ийг 2:0-ээр буулган авч, “1-1” үзүүлэлттэй багуудын эгнээнд шилжлээ. Харин B8 энэ ялагдлын дараа “0-2” байрлалд унаж, тэмцээнээс хасагдах эрсдэлтэй нөхцөлд орсон байна.
Эхний газрын тоглолт B8-ийн сонгосон Mirage дээр болсон. The MongolZ нэг хэсэг 10:2-оор тэргүүлж байсан ч өрсөлдөгч баг эргэн ирж, тоглолтыг нэмэлт үед хүргэсэн. Гэсэн ч монгол баг шийдвэрлэх мөчүүдэд илүү тогтвортой байж, 16:14-өөр газрын ялалт авлаа.
Хоёр дахь тоглолт The MongolZ-ийн сонгосон Overpass дээр явагдсан бөгөөд энэ удаа тоглолтын явц бүрэн монгол багийн хяналтад байв. Азийн баг өрсөлдөгчдөө ердөө гурван раунд алдаж, 13:3-аар итгэлтэй хожсон байна.
910 шилдэг тоглогчоор тодорлоо
Тоглолтын шилдэг тоглогчоор The MongolZ-ийн снайпер 910 тодорчээ. Тэрээр HLTV-ийн Rating 3.0 үзүүлэлт болон хэрэглэгчдийн санал хураалтаар хамгийн өндөр үнэлгээ авсан байна.
Энэ ялалт The MongolZ-ийн хувьд сүүлийн гурван долоо хоног дахь анхны цуврал хожил боллоо. Монголын баг тавдугаар сарын 22-нд CS Asia Championships 2026 тэмцээнд PARIVISION-ийг хожсоноос хойш хоёр цуврал дараалан ялагдаад байсан юм.
IEM Cologne Major 2026 тэмцээн Германд зургадугаар сарын 2-ноос 21-ний хооронд LAN хэлбэрээр зохион байгуулагдаж байна. Шийдвэрлэх шатны тоглолтууд Кёльн хотын Lanxess Arena-д болно. The MongolZ шинэ өмсгөлтэйгөөр, 1xBet Монголын дэмжлэгтэй тэмцээнд оролцож байна.
